DOE, mipaambit sa tukmang 

Paggamit sa mga refrigerator 

TAGBILARAN CITY, Bohol, August 22 (PIA)—Batasana ang regular nga pag-defrost sa inyong refrigerator sa balay. 

Kini maoy tambag sa Department of Energy (DOE) ngadto sa mga konsumidor kinsa karon nabug-atan na sa bayranan sa koryente ilabi na ning panahon nga halos gasobra na ang init sa adlaw. 

Segun pa sa DOE, kon pasagdan nga mobaga na ang ice sa sulod sa freezer, ang pagtuyok sa hangin nga magpabugnaw niini maglisud na sa tuyok, hinungdan usab nga magdoble ang pagtrabaho sa motor niini. 

Ang dugang nga pagtrabaho sa motor, maoy usa sa kinaingnan sa pagsaka sa balayronon sa koryente, dugang sa ahensya. 

Gawas pa sa regular nga pagpatunaw sa ice nga namilit na sa freezer, kinahanglan usab nga matan-aw kon ang gasket sa pultahan sa refrigerator, nagtrabaho pa ba. 

Ang gasket, may magnet ug mahimo nga may mipilit na niini nga mga napunit sa magnet nga mga thumbtacks, lansang, sensilyo nga maoy makababag aron dili na moselyo ang pultahan. Seguradohon nga walay nakabangil niini. 

Pasabut sa DOE, kinahanglang ang gasket, limpyo ug walay guba, tungod kay kon mo-gawas ra gihapon ang bugnaw sa sulod tungod sa guba-on nga gasket. 

Usa ka paagi sa pagsuway kon mayo pa ang gasket mao ang pagpa-ipit sa papel sa pultahan sa ref. Hinayhinayon og hulbot ang papel og kun humok ra ug dali nga birahon, kini timailhan nga m,ay problema na sa gasket. 

Seguradohon usab nga ang luyo sa refrigerator, limpyo ug walay makababag sa pagpagawas sa init sa condensing coils. 

Undangon na usab ang pa-uso nga adto na magpa-uga sa mga nilabhas sa luyo sa refrigerator, tambag sa DOE. 

Kini tungod kay kon dili na makagawas ang init sa condenser, mahimong patrabahoon sa refrigerator ang motor niini, nga makadugang sa konsumo niini sa koryente. 

Gani, labing mayo, kon ang condensing coil sa luyo sa refrigerator, malay buling ug mga abug ug lawa-lawa tungod kay niini, dili makatuyok ang hangin nga makatabang pagpabugnaw sa init na nga ref. 

Importante usab nga ang ref, dili ma-igo sa inot sa adlaw kay magdugang kini sa kaiinit nga pabugnawon sa makina sa sulod. 

Tambag usab sa DOE, pilia na ang mga refrigerator nga may taas nga Energy Efficiency Factor, kay kini nagpasabut nga mas ubos ang konsumo sa koryente niining mga matang sa refrigerator. 

Kon masunod ang gisugyot, segurado ang DOE nga ang konsumo sa koryente, mapa-ubos. 

Panapos sa DOE, sa tukmang paggamit sa refrigerator, kinahanglang e-diskarte, e-power ug e secure mo. (rahc/PIA-7/Bohol)