DOLE, nipasidaan batok sa

pekeng POEA certificate

TAGBILARAN CITY, Aug. 14 (PIA)--Nipasidaan ang Department of Labor and Employment (DOLE) kalabot sa giingong modus sa pag-withdraw sa escrow deposits sa mga recruitment agency gamit ang pekeng sertipikasyon nga gipagawas gikan sa buhatan ug sa Philippine Overseas Employment Administration (POEA).

Kini human nakadawat usab ang DOLE og suwat gikan sa overseas recruitment agencies nga nangutana kalabot sa kun tinuod ba ang sertipikasyon nga giingong gipagawas sa DOLE Legal Service nga gigamit usab aron maka-withdraw og escrow deposit.

Sa gihimong imbestigasyon sa buhatan, natino nga peke ang dokumento ug walay gipagawas ang DOLE Legal Service sa ahensiya. Dugang niini, mitumaw usab nga dili na konektado sa ahensiya ang ni-pirma sa nahisgotang dokumento.

Ang escrow account ginapangayo sa POEA sa mga recruitment agency isip pagpangandam kun magbaton og tulobagon sa umaabot ang kumpanya sa mga overseas contract worker kun may dili mosunod sa kontrata.

Ang pagpagawas sa escrow nga naka-deposito sa POEA-accredited bank gimando sa POEA o sa National Labor Relations Commission (NLRC).

Samtang apil usab sa rekisitos ang DOLE-issued certification nga “no pending POEA case on appeal” aron maka-withdraw og escrow deposits ang recruitment agency.

Nanawagan ang DOLE sa publiko nga kun may nabiktima niini o may impormasyon kalabot niining modus, makig-alayon lamang kanila pinaagi sa pagtawag sa ilang numero nga 527-3000 local 610. (ecb/PIA7-Bohol)