Mahayahay MTB XC sa Carmen 

Sa Agosto 25, pagparehistro na 

TAGBILARAN CITY, Bohol, August 14 (PIA)—Indigay bas a kalig-on sa tuhod, kataas sa lahutay ug kahanas sa pagsuhotsuhot sa mga dalandalan samtang nakiglumba sa imong kaugalingon ug sa uban pinaagi sa pagbisekleta? 

Suwayi og parehistro sa First Mahayahay Mountain Bike Cross Country (XC) Challenge 2018: usa ka 23.75 kilometros nga lumba sa mga dalan dalan ug highways lakip an sa barangay roads sa Carmen, Bohol alang sa Agosto 25. 

Ang lumba, bukas alang sa Open Elite, Seniors o kadtong nag-edad og 29 pa ubos, Masters 1 (30-39) ug Masters 2 (40-49) nga mosubay sa dul-an sa 24 kilometros ang tadlason. 

May category usab sa Golden o kadtong 50 pataas, ug Fatbiker dungan sa Fulsus nga may labing menos 140 mm ang travel sa shocks. 

Ang lumba, nga may P200 nga registration maglakip sa post race nga pagkaon, trophy sa unang tulo ka pwesto ug finishers medal sa tanan, samtang ang deadlines, sa Agosto 25 na. 

Ang lumba adto magsugod sa Sitio Mahayahay, Villarcayo Carmen. 

Alang sa Open Elite, Senior, Masters 1 ug Masters 2, ang ruta mao kini. 

Pagbuhi sa mga misalmot sa lumba, magsugod sila sa 1.5 kilometros nga single track, dayon subay sa 2 km nga highway paingon sa Sitio Ka-Irit sa Poblacion Norte, hangtud nga mosuhot na usab sa 1.8 km nga barangay road sa Sitio Ka-Irit ug Loyu Suba, diin mosuhot na usab sa single track nga may mga technical climb paingon sa Taytay nga gibanabana nga moabut sa 1.8 km, segun pa ni Rey Embradura, biker ug sakop sa technical team nga naglatid sa agi-anan sa lumba. 

Gikan sa Taytay, halos 4.5 km nga hinayhay nga single track padung sa Sitio Upper Tagbaongao sa Barangay Nueva Fuerza, ug mogawas sa Barangay Road nga sementado paingon sa Sitio Lapulapu, mga 2 kilometros nga gibanabana nga gilay-on, dugang niya. 

Gikan sa Sitio Lapulapu, mosulod na usab sa lain nga single track nga may duha ka dagkong canals nga tadlason hangtud mga duha ug tunga ka kilometro sa dili pa motabuk sa lain nga barangay road ilawom sa mga gitanum nga palm oil ngadto sa Sitio Lower La Fortuna sa Barangay Villafuerte, distansya og mga 2.4 km diin may kinahanglang katakus pagkabat sa tulay nga kawayan. 

Gikan sa sitio Lower La Fortuna nga bamboo bridge, subay pa gihapon sa single track paingon sa Sitio Ca-inas sa brgy Montesuerte, mga 2.5 km diin ang 1 ka kilometro niini, technical climb balik sa Taytay ug bolhot na pahaguros sa technical slope panaug paingon sa finishing line mga 1.3 km ang gilay-on. 

Sa Golden ug sa Full Suspension, mga kapin kon kulang 14 kilometros ra ang tadlason, matud ni Embradura. 

Ang ilang ruta, gikan sa Sitio mahayahay, mosubay sa 1.5 km single track gikan sa highway, ug dayon sa 2 ka km nga concrete road highway paingon sa Sitio Ka-irit, sa Poblacion Norte, dayun mosuhot sa 1.8 km nga brgy road sa Sstio ka irit ug Loyu Suba after diin may single track technical climb nga patungas sa Taytay mga 1.8 km ang kalay-on. 

Gikan sa pagabut sa Taytay, mopaingon na dayun sa Sitio Mahayahay, dulhog sa Ca-inas sa brgy. montesuerte diin ang dulhogon may 2.7 kilometros. 

Human sa Ca-inas, brgy Montesuerte, may 2.5 km diin may 1 km nga technical climb pabalik sa sapong sa Taytay ug mobawos dayon ang single track technical nga dulhog paingon sa finishing line mga 1.3 km gikan sa Taytay. 

Ang lumba sa Mahayahay gitanyag ni Capt paul Mesagrande ug sa Lokal nga Kagamhanan sa Carmen ilawom ni Mayor Jun Toribio. 

Ang ruta, bukas alang sa trackread sa mga adlaw nga Sabado ug Domingo, o mahimong makigsabut sa guide kon weekdays. 

Alang sa dugang kasayuran, pakigsabut kang Rey Embradura: 09076681835 o kang Kevin Montajes sa 09172073596. (rahc/PIA-7/Bohol) 

Lakip sa agi-an sa lumba sa Mahayahay ang plateau sa Taytay ug mopakanaug pingon sa Nueva Fuerza, naglangkub sa dul-an sa 24 kilometros nga sagol sagol sa karsada, barangay roads ug highway. (PIABohol) 

Mahayahay usahay pero may mga lugar nga sakit: kini maoy saad sa 1st mahayahay MTB XC sa Carmen karong Agosto 25 na ang duwa. (PIABohol/hulagway ni Paul Mesagrande)