DOST scholarship applications
Hangtud Agosto 31 ra dawaton
Hangtud Agosto 31 ra dawaton
TAGBILARAN CITY, August 8 (PIA)—Sa Agosto 31 na ang katapusan
nga adlaw sa pagduso sa applications alang sa Department of Science and
Technology (DOST) scholarships para sa sunod nga tuig.
Kini samtang gitanyag na usab sa DOST ang programa nga
scholarship alang sa Science and Technology sa sunod nga school year.
Gipasabut ni Bohol DOST Provincial Director Vina Antopina nga
ang programa nagtumong aron aghaton ug agnihon ang mga batan-ong Pinoy nga may
katakus sa siyensya ug teknolohiya nga tubayan ang ilang hilig.
Kini aron ipaneguro nga mapadayon sa nasud ang kadaghanon sa mga
lumilihok sa siyensya ug teknolohiya nga maoy maggiya sa nasud ngadto sa
kaugmaran.
Sa pagpakighinabi, gibutyag sa DOST nga may scholarship sila
alang sa mga Grade VI nga mosulod sa High School, aduna usab alang sa senior
High School nga mosulod sa College samtang subay sa balaod, may tanyag pa nga
scholarship alang sa Junior Level Science Scholarship.
Dugang sa DOST, may dawaton silang scholars nga kadtong
makapasar pinaagi sa RA 7687 o ang Science and Technology Scholarship Act of
1994,” ug ang kadtong makapasar tungod sa maayong gipakita nga katakus sa klase
ilabi na sa siyansya ug matematika o merit, ug may kasibut nga mosubay sa
pagpanarbaho sa mga nagkadaiyang natad sa siyensya ug teknolohiya.
Ang Science and Technology Scholarship Act, kini alang sa mga
estudyante nga may katakus, may kaalam apan kansang mga banay, walay ikasarang
nga panggasto.
Kon makapasar dinhi, ang kurso nga subayon, kinahanglan kadtong
mga kurso sa batakang siyensya, engineering ug uban pang applied sciences ug sa
pagtudlo sa matematika ug siyensya.
Matud sa DOST, kadtong motapos sa Grade VI karong tuiga, kon
madawat, molahus sa pagtungha isip scholar sa mga Philippine Science High
Schools, ug dinhi sa Visayas, mas gipili sa mga scholar ang adto motungha sa
PhiSci sa Argao.
Maka-apply niini kadtong mga natural-born Filipino citizens,
kabus apan may katakus, mahisakop sa nag-una nga 5% sa klase ilabi na sa
science and technology ug matchematics, may mayo nga kinaiya ug makapasar sa
entrance examinations.
Alang sa mga mosulod sa high school ug buot mahimo’ng DOST
Scholar, doula lang sa buhatan sa mga principal sa mga eskwelahan aron makakuha
sa mga application forms ug masayud sa unsa’y mga papeles nga iduso aron madawat
ang applications sa dili pa ang Agosto 31, deadline alang sa mo high school.
Sa College Undergraduate Scholarship, gawas nga kinahanglang
natural born citizen, kinahanglan usab nga nahilusod sa nag-una nga 5% sa klase
ug mas taas nga general weighted average sa science and technology ug
mathematics, samtang kwalipekado na ang tanan nga karon graduating sa STEM
strand.
Kinahanglan usab nga mayo og kinaiya, residente sa lugar sulod
sa upat ka tuig ug makapasar sa entrance examinations nga ihatag.
Kasamtangan, may 315 na ka DOST scholars and nia sa Bohol, usa
sa mga labing daghan sa nasud, butayg ni Provincial director Antopina.
Sa mga makapasar alang sa college scholarships, mahimo usab nga
dinhi na moeskwela sa mga DOST accredited schools nga may PAASCU accreditation
alang sa certificate of Development o Certificate of Excellence sa Commission
on Higher Education (CHED).
Alang sa dugang mga kasayuran, bisitaha ang DOST Bohol sa Lino
Chatto Drive, New Capitol site o sa www.sei.dost.gov.ph. (rahc/PIA-7/Bohol)
No comments:
Post a Comment