Listahan sa 2019 holidays, 

gipagawas na sa Malakanyang 

TAGBILARAN CITY, Aug. 17 (PIA)--Gilagdaan na ni Presidente Rodrigo Duterte ang Proclamation No. 555 nga nagpatik sa mga deklaradong holiday alang sa tuig 2019. 

Sa gipagawas nga proklamasyon, adunay 10 ka regular holidays ug 9 ka special non-working holidays sa sunod tuig. 

Ang mga regular holidays mao ang: Enero 1 (Bag-ong tuig); Abril 9 (Araw ng Kagitingan); Abril 18 (Huwebes Santo); Abril 19 (Biyernes Santo); Mayo 1 (Labor Day); Hunyo 12 (Independence Day); Agosto 26 (National Heroes Day); Nobyembre 30 (Bonifacio Day); Disyembre 25 (Adlaw sa Pasko); ug Disyembre 30 (Rizal Day). 

Samtang ang mga special non-working holidays mao ang: Pebrero 5 (Chinese New Year); Pebrero 25 (EDSA People Power Anniv.); Abril 20 (Sabado Santo); Agosto 21 (Ninoy Aquino Day); Nobyembre 1 (Adlaw sa mga Santos); Disyembre 8 (Kapistahan sa Immaculate Conception of Mary); ug Disyembre 31 (Katapusang Adlaw sa Tuig). 

Apil sa gi-deklarar nga dugang special non-working holiday ang Nobyembre 2 nga adlaw’ng Sabado ug Disyembre 24 nga disperas sa Pasko diin natunong kini sa adlaw’ng Martes. 

Nalakip usab sa listahan ang dugang special non-working holiday sa Disyembre 8 isip kapistahan sa Immaculate Conception of Mary nga natunong sa adlaw’ng Domingo sa 2019. 

Samtang wala pa naapil isip holiday ang pagtimaan sa Eidul Fitr ug Eid’l Adha nga ang petsa niini mag-agad sa Islamic calendar o lunar calendar. 

Alang sa mga nag-planong magbakasyon, adunay 5 ka long weekend sa tuig 2019 base sa gipagawas nga listahan sa holidays sa Malakanyang. (ecb/PIA7-Bohol)