Duterte mangampanya kabahin 

Sa Federalismo sa LMP Visayas 

TAGBILARAN CITY, Bohol, August 20 (PIA)—Gipaabut nga ikampanya ni Presidente Rodrigo Duterte ang sistema nga Federalismo ngadto sa mga mayor sa Visayas Cluster kinsa naghimo sa ilang tulo ka adlaw nga panagtapok didto sa Sugbo, sugod Agosto 21. 

Si Presidente Duterte, gi-imbitar aron mamulong sa mga sakop sa League of Municipalities of the Philippines (LMP) Visayas Island Cluster, sa ilang tulo ka adlaw nga tigum. 

Matud sa mga tinubdan sa Malakanyang, importante sa Presidente nga ikapadagan ang lihok sa pag-usab sa Sistema sa kagamhanan sanglit kini nga Sistema nga nia karon, sa sa mga naka-angin nga ang mga lungsod nga halayo sa mga syudad, mauwahi na hinuon sa pagpa-ugmad. 

Ang Pilipinas, sa kasamtangan, may unitary nga dagway sa kagamhanan, diin halos tanan na nga hukom ug desisyon, palisiya ug mga programa nga ipatuman, nagagaikan sa sentralisadong nasudnong kagamhanan sa Manila. 

Ilawom sa federalismo, ang gahum, sawhan na sa nasudnong kagamhanan ug sa local nga mga estado federal. 

Misalig si Duterte nga sa bag-ong sistema nga buot niyang ipatuman segun sa iyang saad sa eleksyon, dako og ikatabang aron gamhan ang mga local nga kagamhanan sa paghimo sa unsay angayan alang kanila. 

Ang pagpamulong sa pangulo sa nasud sa LMP Visayas Cluster convention, gikompirmar na usab ni Journal Fabella: ang Media Accreditations and Relations Officer (MARO) nga gitahasan sa maong pagbisita sa Presidente. 

Matud ni Fabella, Si Presidente Duterte, gipaabut nga makig estorya sa 369 ka mga mayor sa mga kalungsuran sa Regions 6, 7 ug 8 Agost0 21 sa gabii. 

Gibutyag usab ni Tuburan Mayor Aljun Diamante, LMP President Cebu Chapter nga ang Presidente, mang-aghat sa mga mayores, aron ipasabut kanila ang kamahinungdanon sa pagtikang ngadto na sa Federalismo nga matang sa kagamhanan. 

“Misaad na si Presidente Duterte nga mo-abut pagtambong sa LMP Visayas Cluster nga tigum, butyag ni Mayor Diamante. 

Human na og pamulong ang Presidente sa mga mayors nga sakop sa Mindanao Island Cluster Annual Conference nga didto mahitabo sa Davao sa miaging buwan. 

Ang tigum usab sa Presidente ug sa mga mayors sa Luzon mahitabo sa Septembre pa pohon. 

Kini maoy ika lima na nga pagyanda sa Presidente sa Sugbo. (rac/PIA7-Bohol) 

Ikampanya ni Presidente Rodrigo Roa Duterte ang Federalsimo ngadto sa mga mayor sa Visayas Cluster Agosto 21 sa ilang pagtakok didto sa Sugbo. (PIA-7/Bohol)