Mga ahensiya sa gobyerno nga 

di mo-ila sa Phl ID, pamultahon 

TAGBILARAN CITY, Aug. 9 (PIA)--Nipasidaan ang Philippine Statistics Authority (PSA) nga may kaatbang nga silot ang mga ahensiya sa gobyerno nga dili mo-ila sa Philippine ID. 

Ubos sa Philippine ID System Act, pamultahon og P500,000 ang bisan kinsang dili mo-ila niining ID. 

Ang mga mogamit usab sa Philippine ID sa bisan unsang matang sa pagpangilad, may silot nga unom ka buwan hangtod duha ka tuig nga pagkabilanggo ug may multang P50,000 hangtod sa P500,000. 

Gibutyag usab ni PSA administrator Lisa Grace Bersales nga ang mga magpagawas og datos o impormasyon nga walay otorisasyon sa tag-iya sa ID, mabilanggo og unom hangtod 10 ka tuig ug may multang P3 milyon taman P5 milyon. 

May silot usab nga pagkabilanggo og 10 hangtod 15 ka tuig ug multang P5 milyon taman P10 milyon alang sa bisan kinsang opisyal o kawani sa PSA nga magdumala sa Philippine ID nga malisyosong magpagawas og datos o impormasyon sa usa ka indibidwal. 

Libreng ihatag sa gobyerno kining ID diin birth certificate lamang ang requirement aron makakuha niini. 

Gi-klaro sa PSA nga dili mandatory ang pagkuha sa ID, apan gitumbok sa ahensiya nga kadtong wala niini, maglisod sa pag-akses sa mga serbisyo ug transaksiyon sa gobyerno. 

Target sa PSA nga mapatuman kini sugod karong tuig ug ang pinaka-kabos nga sektor sa nasod ang unang prayoridad nga mahatagan niniing ID sulod sa usa hangtod sa duha ka tuig. (ecb/PIA7-Bohol)