Mga bag-ong natawo, 

i-apil sa nat’l ID system 

TAGBILARAN CITY, Aug. 8 (PIA)--I-apil na sa bag-ong balaod nga Philippine National ID System ang mga bag-ong natawo sa Pilipinas. 

Sa gipahigayong Pulong Balitaan sa Malakanyang karong adlawa, gibutyag ni Philippine Statistics Authority (PSA) Administrator Liza Grace Bersales nga pagkahimugso pa lang sa usa ka bata ug napasa sa local civil registry ang certificate of live birth sa PSA, hatagan kini dayon og citizen’s number. 

Ibutang sa maong ID card sa bata ang social security number sa inahan niini o guardian. 

Apan gi-dugang usab ni Bersales nga sa pag-abot sa 5 anyos nga edad sa bata pa lamang mahimong kuhaan kini og biometrics o sa pagsugod og tungha sa kindergarten. 

Ang ID card number sa bata maoy magsilbing student number niini hangtod sa paghidangat niini sa kolehiyo o bisan mokuha og post graduate studies. 

Pagabalikon na lamang ang biometrics sa paghidangat sa 15 o 18-anyos depende sa implementing rules and regulations nga kasamtangang gihipno pa karon. 

Gibutyag ni Bernales nga usa ka milyong Unconditional Cash Transfer (UCT) benepisyaryo ang unang mahatagan sa Philippine I.D alang sa pilot issuance niini. 

Giingong sa dili pa matapos karong tuig, gipaabot nga mahatag na sa mga benepisyaryo sa UCT ang ilang mga identification cards. 

Samtang giseguro sa PSA administrator nga walay angay ikabalaka ang mga Filipino tungod kay parehong mga demographic information sa ubang mga IDs ang ila ra usab ibutang sa national ID. 

Apil na niini ang pangalan, petsa sa adlaw’ng natawhan, lugar diin gipanganak, sex, blood type, address ug nationality. 

Samtang optional ang marital status, email address ug ang mobile phone number. (ecb/PIA7-Bohol)