Industriyalisasyon ug mekanisasyon, 

gikinahanglan sa atong nasod – Atty. Hinlo 

TAGBILARAN CITY, Sept. 25 (PIA)--Gawas sa proyektong Build, Build, Build sa gobyerno, gikinahanglan usab sa atong nasod ang industriyalisasyon ug mekanisasyon. 

Kini ang gipa-ambit ni Atty. Jesus V. Hinlo Jr. sa gatosan ka mga information ug tourism officers nga nitambong sa ika-24 nga Regional Association of Development Information Officers (RADIO) 7 Convention niadtong Setyembre 19, 2018 sa Dumaluan Beach Resort sa lungsod sa Panglao. 

Atol sa pagbukas sa convention, si Hinlo mihagit sa mga information officers ug tourism officers nga modapig sa paghatag og pagtagad sa kalikopan aron sa ingon makahatag og paglamdag sa katawhan nga angayang atimanon ang kina-iyahan ug dili pasagdan labi pa nga ang isla sa Panglao usa man ka tourist destination nga maoy usa sa nagbuhi sa turismo ning lalawigan. 

Gihimong sanglitanan ni Hinlo ang nahitabong pagpasarado sa isla sa Boracay diin gipasagdan ang pagos-os sa kahimtang sa isla. 

Matud pa ni Hinlo nga angay hatagan og pagdasig ang katawhan nga atimanon ug panggaon gayud ang kalikopan. 

Si Hinlo nga usa ka private sector representative sa Land Bank of the Philippines, maoy pinasidunggang dinapit sa maong convention. 

Ang tigom karong tuig nagdala sa tema nga “Achieving Sustainable Environment through Strategic Developmental Communication” nga gibuksan niadtong Setyembre 19 ug natapos niadtong Setyembre 21, 2018. 

Ang RADIO-7 maoy pederasyon sa tanang government information officers sa mga kalungsoran, syudad ug pronbinsiya sa Cebu, Bohol, Negros Oriental ug Siquijor. 

Gilangkoban kini sa Association of Government Information Officers (AGIO) 7 sa Cebu; Cebu Association of City and Municipal Public Information Officers (CAOCAMPIO) sa Cebu; Siquijor Association of Information Disseminators (SAID) sa Siquijor; Association of Negros Oriental Public Information Officers (ANOPIO) sa Negros Oriental; ug Association of United Development Information Officers (AUDIO) sa Bohol nga maoy host sa convention karong tuig. (ecb/PIA7-Bohol). 

RADIO-7Con 2018. Private sector representative sa Land Bank of the Philippines, Atty. Jesus V. Hinlo Jr. mihagit sa mga information officers ug tourism officers atol sa RADIO-7 Convention nga modapig sa paghatag og pagtagad sa kalikopan aron makahatag og paglamdag sa katawhan nga angayang atimanon ang kina-iyahan ug dili pasagdan labi na ang isla sa Panglao nga usa ka tourist destination nga maoy usa sa nagbuhi sa turismo sa Bohol. (PIA-Bohol)