SSS, milusad sa ilang 

kaugalingong mobile app 

TAGBILARAN CITY, Sept. 26 (PIA)--Maka-akses na karon ang mga miyembro sa Social Security System (SSS) sa ilang membership information gamit ang ilang smartphones ug tablets pinaagi sa bag-ong SSS Mobile application. 

Matud pa ni SSS President ug Chief Executive Officer Emmanuel Dooc, ang maong mobile application gilusad aron maghatag sa mga miyembro og mas kombenyenteng pamaagi sa paglantaw sa ilang personal records ug uban pang mahinongdanong impormasyon nga dili na kinahanglan pang mobisita sa ilang mga SSS branches. 

Libre ang serbisyo alang sa nahisgotang SSS Mobile App alang sa mga miyembro nga adunay smartphones ug tablets nga may Android 4.4 Kitkat o mas taas pa ug IOS 8.0 o mas taas pa. Ang maong app mahimong ma-download sa Google Play Store ug sa Apple App Store. 

Sa pagsugod og gamit sa bag-ong SSS Mobile application, kinahanglang mo-log in ang mga users gamit ang ilang kasamtangang My.SSS account's user ID ug password. Ang mga miyembro nga wala’y My.SSS account makagamit gihapon gamit sa SSS Mobile App sa pagmugna og account pinaagi sa pagpili sa “Register” nga makita sa Apps’ sidebar. 

Kinahanglan lamang konektado sa internet pinaagi sa mobile data o WIFI connection sa dili pa mogamit sa SSS Mobile App. Apan ang data charges mo-apply depende sa ilang internet service provider o data usage plan. 

Apil sa mga impormasyon sa SSS nga mahimong ma-akses pinaagi sa SSS Mobile App mao ang contribution status; sickness, maternity, disability ug retirement claim information; Employees Compensation (EC) Medical status; salary loan application status ug outstanding balance; lokasyon sa SSS branch offices; ug documentary requirements alang sa SSS membership, benefit claims application (i.e. sickness, maternity, EC Medical, disability, retirement, funeral ug death), personal data amendment, ug UMID Card enrollment. 

Gipasalig hinuon ni Dooc nga dili angay mabalaka ang mga miyembro sa bisan unsang ‘data breach’ tungod kay ang SSS Mobile App adunay kaugalingong security features ug nanginahanglan og entry sa user ID ug password. 

Alang sa dugang kasayoran ug pangutana kalabot sa SSS Mobile App, mahimong mobisita ang mga miyembro sa SSS Website (www.sss.gov.ph), motawag sa SSS Call Center Hotline 920-6446 taman 55 o local toll-free number 1-800-10-2255-777, o magpadala og email ngadto sa onlineserviceassistance@sss.gov.ph. (ecb/PIA7-Bohol).