Quarry operations sa Bohol gisuspenso

TAGBILARAN CITY, Sept. 27 (PIA)--Gipa-suspenso ni Gob. Edgar Chatto og 15 ka adlaw ang tanang quarry operations sa lalawigan sa Bohol samtang naghulat og assessment human sa nahitabong pagdahili sa yuta sa Itogon, Benguet ug syudad sa Naga, Cebu.

Si Chatto mipagawas og memorandum order nga nag-suspenso sa mga operasyon sa quarry sa tibuok lalawigan epektibo Setyembre 24 taman Oktubre 15, 2018.

Agi kini og paghatag og kahigayonan sa pagpahigayon og safety ug geo-hazard evaluation sa mga palibot sa mga nahimutangan sa quarry sites.

Ang gobernador mipagawas na usab og laing memorandum nga nagmugna og multipartite assessment team nga mopahigayon og safety ug geo-hazard evaluation nga pangunahan sa Bohol Environment and Management Office (BEMO).

Ang maong ebalwasyon naglakip sa environmental risk assessment, sigun pa ni BEMO head Jovencia Ganub.

Ang mando ni Chatto agi og pagsunod sa memorandum gikan ni Director IV Wilfredo Moncano sa Mines and Geosciences Bureau (MGB) Central Office tungod sa mga nahitabong pagdahili sa yuta sa nagkalain-laing lugar sa nasod.

Ang MGB memorandum gi-isyu sa mga buhatan niini sa Central Visayas ug 8 ka uban pang rehiyon.

Ang Bohol nakapa-agni sa mga ilegal nga minero tungod sa mga lugar dinhi nga may mga metallic minerals sama sa mga bulawan sa mga lungsod sa Talibon ug Trinidad.

Apan pipila usab ang nagdumili sa pagsunod sa polisiya sa pagmina bisan pa sa pagbalik-balik og panawagan gikan sa BEMO.

Kahinumdoman nga niadtong Marso 2018, duha ang nalubong-patay tungod sa pagdahili sa yuta samtang sila nag-quarry og limestone sa usa ka ilegal nga quarry site sa Barangay Candabong sa lungsod sa Anda. (ecb/PIA7-Bohol).