Bagyo nga nag-ong-ong 

sa PAR, dili “mo-landfall” 

TAGBILARAN CITY Bohol, October 1 (PIA)—Nag-ong-ong na ang bagyo nga gihinganlan og KongRey samtang paingon na nga mosulod sa Philippine Area of Responsibility (PAR), kon kon masulod na, ilhon na kini og bagyo nga “Queenie,” matud sa Philippine Atmospheric Geophysical ug Astronomical Services Administration (Pag-asa). 

Apan, hinuon, subay sa typhoon model nga gigamit sa Pag-asa, dili na makatamak sa yuta si Queenie, og kon mopadayon sa iyang direksyon nga gisunod, makagawas lang usab kini sa PAR sa Oktubre 4. 

Sa ilang Severe Weather Bulletin nga gipagawas sa alas 5:00 sa hapon sa Oktubre 1, gipahibaw na sa Pag-asa nga ang bagyo nga si Queenie gipaabut nga mosamut pa og ka kusog kon makasulod na sa PAR ug kini gibanabana nga mag-irug sa rumbo nga pa-Kasadpan-AmihanangKasadpan paingon sa habagatan nga bahin sa Japan. 

Sa Octobre 1, sa alas 4:00 sa palis, ang sentro sa bagyo, gipanid-an nga naa na, base sa mga kahimanan nga nagtutok niini ug sa mga kasayuran nga mahagpat, nga naa na sa 1,170 kilometros sa kasubangan-Amihanangkasubangan sa Borongan City sa Eastern Samar gawas pa hinuon sa PAR (16.4 °N, 135.1 °E). 

Sa iyang kakusog, dala niini ang labing kusog nga hanging a naa sa 160 kilometros matag oras duol sa sentro niini ug kalit nga huros nga moabut sa 195 km/h. 

Matud sa Pag-asa, ang bagyo ilang gipanid-an nga hinay nga nagsibog sa rumbo nga Amihanang –Kasadpan sa gikusgon nga 15 km/h. 

Tungod niini, masinati nag sugod sa Benguet, Nueva Vizcaya, Quirino, ug Aurora taman sa Huwebes pohon ang hinay ug panagsa nga kasarangan nga uwan. 

Sa amihanang Luzon, ang paglawig sa kadagatan ug kalawran, giisip na nga delikado. 

Ugma sa hapon, o humans a 24 oras, gibanabana nga ang bagyo nga si Queenie naa na sa 1,120 km kasubangan sa Tuguegarao City, Cagayan o (18.3°N, 132.3°E). 

Sa 48 oras o sa Miyerkoles sa hapon, naa na sa 775 km kasubangan sa Basco, Batanes (20.6°N, 129.4°E) samtang human sa 72 oras, sa Huwebes sa hapon, naa na sa 580 km kasubangan –amihanang kasubangan sa Basco, Batanes (22.7°N, 127.0°E). 

Sa Biyernes sa buntag, human sa 96 oras, naa na kini sa 700 km amihanan-Amihanang kasubangan sa Basco, Batanes ug nakagawas na sa PAR (26.1°N, 125.0°E). 

Walay tropical cyclone warning nga gipagawas sa Pag-asa alang ni Queenie. (rahc/PIA-7/Bohol)