Mi-mahal nga presyo sa lana sa 

Global market palit nakaangin 

sa nagkamahal nga gasolina 

TAGBILARAN CITY, Bohol, September 28 (PIA)—Alang sa mga abtik mopahid sa basul sa mga palisiya sa goberno sa pagsulbong sa presyo sa gasoline ug krudo, nia’y angay ninyo mahibaw-an. 

Sa pagsulbong sa presyo sa gasolina ug krudo ning milabay nga mga adlaw, makita sa pagpasihag nga monitoring sa Department of Energy nga sa pagpamalit sa krudo ug gasoline sa Septembre 17 ngadto sa 21, ang krudo gikan sa Dubai mi-mahal sa iyang senemanang average sa kadak-on nga duol sa US$0.25 sa matag baril. 

Sa lain nga bahin, ang gibasehan sa presyo sa krudo ug gasoline sa Pilipinas nga Mean of Platts Singapore (MOPS) mipasaka sa ilang presyo sa gasolina nagdto sa US $0.39 ang matag baril ug US $ sa matag krudo, US$0.14 and matag baril. 

Ang MOPS mao ang average sa mga presyo nga gilansang sa usa ka Singapore-based nga pagtimbang sa presyo sa mga produkto nga lana nga gipatik sa Platts, usa ka tighatag sa kasayuran kabahin sa global energy, petrochemicals, metals ug agriculture. 

Gitumbok nga ang medyo paghugot sa relasyon sa patigayon tali sa US ug China mahimong mopasamut pa niining panginahanglan sa global nga panginahanglan sa krudo. Ang China maoy ika duha nga labing lapad nga konsumidor sa lana sa tibuok kalibutan. 

Gawas pa niana, ang gihulga nga silot sa Iran gikan sa Amerika tungod sa isyu nukleyar, nakaapekto na sa tinubdan sa lana sa pangkalibutang merkado. 

Dala sa hulga sa silot, ang krudo nga import gikan sa Iran mikunhod na og 580,000 ka baril matag adlaw sa katapusan nga tulo ka buwan nga milabay, segun pa sa monitoring sa DOE. 

Ang Iran nagpabilin gihapon nga ika tulo nga labing dako nga tinubdan sa lana sa Organization of Petroleum Exporting Countries (OPEC). 

Niadtong 2017, ang iyang average nga lana nga makuha naa sa 3.8 milyones ka baril matag adlaw. 

Bisan pa nga labing dako nga hinungdan sa pagmahal sa gasoline ug krudo tungod sa nagkayagaw nga presyo sa gawas nga merkado, mi-angkon usab ang kagamhanan nga may gikatampo ang pag-ubos sa bili sa peso kon itandi sa dolyar nga maoy gamiton sa international nga pinalitay. 

Ang week-by-week nga pag-ubos sa presyo sa Peso batok sa dolyar, naa na sa P 0.12 ngadto sa 54.08 gikan sa Php 53.96 nagdugang sa pagpamahal sa komprada samtang nagpakunhod sa bili sa kwarta. (rahc/PIA-7/Bohol)