Balaod alang sa saktong nutrisyon 

sa mga bata, gilagdaan na ni Duterte 

TAGBILARAN CITY, Dec. 11 (PIA)--Gilagdaan na ni Presidente Rodrigo Duterte ang first 1,000 days law o balaod alang sa saktong nutrisyon sa mga bata nga nagtinguhang mahatagan og serbisyong panglawas ug nutrisyon ang mga bag-ong gi-anak nga masuso. 

Nakalatid sa Republic Act 11148 o “Kalusugan at Nutrisyon ng mga Nanay Act”, nga angay seguradohong adunay komprehensibo ug malungtarong multi-sectoral strategies alang sa mga masuso, bata, buntis, lactating women ug adolescent females. 

Apil sa mga ihatag nga serbisyo ang follow-up preventive-care visits o home visit alang sa mga naa sa lagyong dapit nga komunidad, saktong pagpamakuna sa mga bag-ong gi-anak nga masuso ug newborn-care nga serbisyo sama sa eye prophylaxis ug vitamin K, birth doses sa hepatitis B ug BCG nga bakuna. 

Pagtungtong sa unom ka buwan hangtod 2 ka tuig sa bata, hatagan sila og deworming tablets, oral-health services ug tabang panginabuhian alang sa mga inahan nga gikan sa kabos nga pamilya. 

Gitahasan ang Department of Health (DOH), National Nutrition Council (NNC) ug ang Department of Agriculture (DA) nga makiag-alayon sa ubang ahensiya sa gobyerno lakip na ang local government units aron magmugna og mga national nutrition nga palisiya, plano, stratehiya ug uban pa aron masegurong hapsay nga mahatagan og nutrisyon ang mga nahisgotan. 

Mo-alagad isip ex-officio chairperson sa NNC ang kalihim sa DOH, samtang vice chairpersons usab ang mga kalihim sa DA ug DILG. 

Mahimong miyembro usab sa board of council ang mga kalihim sa Department of Social Welfare and Development (DSWD), Department of Trade and Industry (DTI), Department of Labor and Employment (DOLE), Department of Science and Technology (DOST), Department of Budget and Management (DBM) ug National Economic and Development Authority (NEDA). 

Gipakusog niining bag-ong balaod ang pagpatuman sa Executive Order No. 51 o ang “Milk Code” ug ang Republic Act 10028 o ang “Expanded Breastfeeding Promotion Act of 2009” nga nagpatuman sa optimal infant ug young child feeding ug maturity protection. (ecb/PIA7-Bohol)