Listahan sa mga gidili nga 

pabuto, gipagawas na sa PNP 

TAGBILARAN CITY, Dec. 13 (PIA)--Gipagawas na sa Philippine National Police-Firearms and Explosives Office (PNP-FEO) ang listahan sa mga gidili nga pabuto duha ka semana sa dili pa ang pagsaulog sa Pasko ug Bag-ong Tuig . 

Si FEO Director Chief Supt. Valeriano De Leon mipahayag nga gipagawas og sayo ang listahan alang sa kasayoran sa publiko ug aron mahibaw-an usab kun padayon nga gibaligya ang mga gidili nga pabuto. 

Matud pa nga bawal ang mga pabuto nga may kapin sa 0.2 ka gramo nga eksplosibo. 

Bawal usab ang mga oversized o dagkong pabuto nga may short fuse o kadtong mga mobuto dayon sa wala pay tulo ka segundo. 

Ang mga gibawal nga pabuto mao ang: atomic bomb, atomic triangle, Bin Laden, Bosa, coke in can, five star, giant whistle bomb, Goodbye Philippines, kabasi, dagkong Judas belt, dagkong bawang, lolo thunder, mother rocket, piccolo, pillbox, pla-pla, super lolo ug watusi. 

May mga pabuto nga mahimong gamiton sulod lamang sa barangay firecracker zones sama sa baby rocket, bawang, el diablo, judas belt, kwitis, paper cups, pulling of strings ug gagmay nga trianggulo. 

Samtang ang mga pyrotechnics nga mahimong gamiton bisan sa gawas sa firecracker zones mao ang butterfly, fountain, jumbo regular special luces, mabuhay, roman candle, sparklers, trompilo ug whistle devises. 

Nipasidaan ang kapolisan sa publiko nga dili mopalit sa mga gidili nga pabuto aron malikay sa disgrasya. (ecb/PIA7-Bohol)