Mga frontliners, may 3K 

hazard pay matag buwan 

TAGBILARAN CITY, Dec. 14 (PIA)--Makadawat ang mga fronliners sa mga ospital sa lalawigan sa Bohol og P3,000 hazard pay matag buwan ug P5,000 nga binuwan nga allowance alang sa mga buwan sa Setyembre taman Disyembre ning tuig. 

Kini human gilagdaan ni Gob. Arthur Yap ang memorandum of agreement (MOA) kauban sa Department of Health (DOH) alang niining katoyuan niadtong Biyernes, Disyembre 11. 

Base sa MOA, ang DOH ang mohatag sa actual hazard duty pay (AHDP) nga dili moubos sa P3,000 matag buwan ug sa COVID-19 special risk allowance nga dili moubos sa P5,000 matag buwan sa kada frontliner sa mga ospital gikan sa buwan sa Setyembre 15 taman sa Disyembre 19 ning tuig. 

Samtang gipahibalo usab ni Gob. Yap nga ang kagamhanang probinsyal magdugang og P150 sa binuwan nga allowance sa mga barangay health workers (BHWs) sugod sunod tuig ug dugangan pa kini taman sa tuig 2022. 

Ang gobernador mi-ila sa dakong papel sa mga BHWs ning panahon sa pandemya diin ang dugang nga honorarium sa mga BHWs agi og konsiderasyon sa ilang dugang nga trabaho sunod tuig. 

Kini tungod kay sugod sa tuig 2021, ang mga BHWs na ang mohimo sa information and education campaign sa paggamit sa herbal medicines nga aprobado sa DOH batok sa COVID-19. 

Ang mga magamit nga herbal medicines naglakip sa ahos, ampalaya, angit-ngit, bayabas, halilib-on, helbas, lagundi, lubi lubi, sinew-sinaw ug sunting. 

Kalabot niini, si Gob. Yap mi-awhag sa matag barangay sa paghimo og medicinal nga garden. (ecb/PIA7-Bohol)