Mandatory na ang pagsuot og face shield
ug face mask sa mga pampublikong lugar

TAGBILARAN CITY, Dec. 15 (PIA)--Mahimong mandatoryo na ang pagsuot og face shield ug face mask kun mogawas sa balay. 

Matud pa ni Presidential Spokesman Harry Roque, kini ang gimando sa Inter-Agency Task Force for the Management of Emerging Infectious Diseases aron mapugngan ang pagkatap pa sa COVID-19. 

Kun kaniadto ang mandatoryo nga pagsuot og face mask ug face shield gipatuman lamang sa mga malls ug pampublikong transportasyon, karon ipatuman sa tanang mga pampublikong lugar. 

Giklaro usab ni Roque nga ang gitugotan lamang nga tabon sa nawong mao ang full face shield diin nagpasabot nga gikan sa buna hangtod sa ubos sa nawong sa tawo ang matabonan. 

Ang maong bag-ong direktiba sa IATF gipagawas human na usab sa kahadlok sa posibleng pagsaka sa gidaghanon sa mga kaso sa COVID sa panahon sa holiday season. 

Tuyo sa gobyerno nga kunhoran ang pagkatap sa COVID-19 karong holiday season. 

Nanawagan ang gobyerno sa publiko nga likayan ang mga lugar nga gidagsa sa daghang tawo ug mga enclosed areas o saradong lugar ug molikay sa pag-apil o pag-organisa og social gatherings karong Christmas season. (ecb/PIA7-Bohol)