NAPC ug Probinsya sa Bohol, milagda 

og MOA agi og suporta sa 3S Program 

TAGBILARAN CITY, Dec. 15 (PIA)--Gilagdaan sa National Anti-Poverty Commission (NAPC) ug sa Pangagamhanang Probinsyal sa Bohol ang memorandum of agreement agi og suporta sa Sambayanihan Serbisyong Sambayanan (3S) Program niadtong Lunes, Disyembre 14, 2020. 

Gipangunahan nilang Gob. Arthur Yap ug NAPC Secretary ug Lead Convenor Atty. Noel Felongco ang paglagda sa MOA sa pag-implementar sa 3S Program, usa ka five- year development plan sa NAPC alang sa pagpakunhod sa kakabos dinhi sa lalawigan sa Bohol. 

Usa sa katuyoan niini mao ang panagtagbo diin usahon ang mga inisyatiba sa tanan ilabi na ang pagpangita sa mga financial resources. 

Ang konsepto niini mao ang “whole of the nation approach” diin kuyog tanan ang mga nagkalain-laing ahensya sa gobyerno, lakip na ang mga lokal nga kagamhanan, ang mga katawhan ug ang civil society organizations alang sa paghatag sa mga nag-unang serbisyo alang sa katawhan ilabi na sa mga mas nanginahanglan. 

"Nagpasalamat kaayo akong ahensya nga mainiton kaayo ang pagdawat sa probinsya sa Bohol thru Go. Arthur Yap ang amoang himoong intervension diri sa probinsya sa Bohol", matud pa ni Felongco. 

"Dako kaayo among pasalamat, ilabi na kang Gov. Yap, kay first time in the history of the country nga ang NAPC duna nay office sa usa ka probinsya, ug diri na nahitabo sa probinsya sa Bohol", dugang pa niini. 

Kalabot niini, opisyal usab nga gibuksan ang buhatan sa NAPC sa Bohol nga nahimutang sa unang andana sa daang kapitolyo sa syudad sa Tagbilaran. 

Gipangunahan ang ribbon cutting nilang Gob. Yap ug NAPC Kalihim Felongco kauban nila Tagbilaran City Mayor John Geesnell Yap, Board Member Mimi Boniel-Maglasang ug Donald Sevilla. 

Ang NAPC usa ka ahensya sa gobyerno nga maoy nag-koordinar sa mga programa sa pagpaminus sa kakabus sa nasudnon ug lokal nga pangagamhanan. (ecb/PIA7-Bohol) 

Gipangunahan nilang Gob. Arthur Yap ug NAPC Secretary ug Lead Convenor Atty. Noel Felongco ang paglagda sa MOA sa pag-implementar sa Sambayanihan Serbisyong Sambayanan (3S) Program, usa ka five- year development plan sa NAPC alang sa pagpakunhod sa kakabos dinhi sa lalawigan sa Bohol, niadtong Lunes, Disyembre 14, 2020. (Gov. Art Yap FB page)