GFAL program sa GSIS, 

gi-uswag taman Disyembre 2021 

TAGBILARAN CITY, Jan. 6 (PIA)--Gipahibalo sa Government Service Insurance System (GSIS) nga ang ilang loan transfer ug consolidation program nga GSIS Financial Assistance Loan o GFAL program gi-uswag na usab og laing usa ka tuig. 

Matud pa sa GSIS, ang mga interesadong miyembro niini mahimong mo-aplay sa maong programa hangtod Disyembre 31, 2021 aron makapahimos sa benepisyo sa GFAL flexible credit facility. 

Ang GFAL program ning bag-o lang gipalapdan diin naglakip na sa mga aktibong miyembro kansang employment status naglakip sa mga appointed, elected, o non-permanent ug kansang periods with paid premiums (PPP) dili moubos sa 15 ka tuig. 

Gawas niini, ang GSIS mipakunhod usab sa kaniadtong tulo ka buwan nga payslip requirement ngadto nalang sa usa ka buwan gikan sa petsa sa pagduso sa aplikasyon. 

Ubos sa GFAL, ang usa ka miyembro sa GSIS mahimong i-transfer ang ilang loan nga taman P500,000, ngadto sa pension fund gikan sa mga lending institutions, sama sa mga government banks ug cooperatives, nga mga akriditado sa ilang ahensya. 

Ang loan nga may mas ubos nga interest rate nga 6% per annum ug adunay mas taas nga repayment period nga unom ka tuig, direktang ibayad ngadto sa mga lending institutions. 

Alang sa dugang kasayoran, gi-awhag ang mga miyembro sa pagbisita sa GSIS website nga https://www.gsis.gov.ph/ o sa opisyal nga Facebook page niini nga https://www.facebook.com/gsis. ph. (ecb/PIA7-Bohol) 

Ang GSIS Financial Assistance Loan (GFAL) program gi-uswag na usab og laing usa ka tuig o taman Disyembre 31, 2021 agi og paghatag og kahigayonana sa mga kawani sa Department of Education ug uban pang ahensya sa gobyerno og dugang panahon sa pag-aplay ug pagpahimos sa mga benepisyo sa flexible credit facility sa GFAL. (GSIS)