Ika-5 adlaw sa COVID test alang sa mga

mamauleng Pinoy, ipatuman sa IATF

MANILA, Jan. 21 (PIA)--Gidugangan ang requirements alang sa mga mamauleng Filipino sa nasod, aron maseguro nga mapugngan ang pagsulod pa sa bisan kinsang posibleng adunay COVID-19 United Kingdom (UK) variant.

Gipahibalo sa Inter-Agency Task Force (IATF) nga gitarong na sa technical working group ang pagbaton og ‘fifth day testing’ ilabi na nga nanginahanglan kini og dugang nga mga testing kits ug mga kawani nga mopahigayon niini.

Kini tungod sa nadiskobre sa mga eksperto nga sa unang adlaw nga gipaubos sa test ang unang Pinoy nga may UK variant, negatibo kini sa virus, apan pipila ka adlaw nagpositibo na kini sa maong sakit.

Gipasabot ni Department of Health (DOH) Undersecretary Maria Rosario Vergeire nga posibleng naa sa incubation period pa lang ang virus sa unang adlaw sa gipahigayong test, mao nga na-detect lamang kini pagkalabay sa halos usa ka semana.

Nagtuo si Vergeire nga pinaagi sa 14-day mandatory quarantine ug fifth day COVID-19 testing, mas mabantayan ang nasod batok sa pagsulod sa bag-ong variant nga giingong mas paspas makatakod.

Samtang gipahibalo sa DOH nga nikabat na sa 13 ang nakauban sa unang kaso sa UK variant sa nasod nga nasakit sa COVID-19.

Matud pa ni Vergeire nga nagpositibo usab sa makatakod nga sakit ang inahan ug uyab sa lalaking unang natakdan sa bag-ong variant sa COVID-19.

Giingong gipadala na sa Philippine Genome Center ang specimen nga nakuha sa duha. (ecb/PIA7-Bohol)