WHO: Moderna labing mahal, 

AstraZeneca labing barato nga bakuna

TAGBILARAN CITY, Bohol, Jan. 19 (PIA) -- Kon presyo ang hisgutan, ang Moderna, ang bakuna batok sa coronavirus disease (COVID-19), maoy may labing mahal sa unom ka mga nag-una nga bakuna nga mahimong magamit sa mga katawhan.

Segun sa mga kasayuran nga gikan sa World Health Organization, mga ahensya nga nagtutok sa bakuna ug mismo nga mga kompanya sa bakuna, napakita nga ang Moderna (USA) nga mugna nga bakuna gamit ang messenger Ribonucleic Acid (MRNA) mapalit sa tag $33 ang matag tupok.

Ang bakuna nga Moderna nga nakalabang na sa tulo ka medical trials may 95% nga ka epektibo, gikinahanglang nga itupok sa makaduha nga higayon o $66 alang sa usa ka tawo, katumbas na sa P3,300.

Sunod sa labing mahal nga bakuna mao ang sa Pfizer-BioNtech (USA-Germany), nga sama sa Moderna, migamit sa binag-ong teknolohiya nga gitawag og MRNA.

Bakuna nga miangkon nga 95% usab ka epektibo, ang bakuna sa Pfizer mapalit sa tag $20 matag tupok ug nangnahanglan og duha ka tupok arom moepekto mao nga kini may local nga bili nga anaa sa P2,000 matag tawo nga tupokan.

Ang bakuna nga ginama sa Russia nga Gamaleya Institute maoy ikatulo sa labing mahal.

Ang Sputnik V may gikataho nga 91.4% ka epektibo padayon pang gihimoan sa ika tulong hugna sa medical trials ug migamit sa adenoviral-vector-based platform, aron makabuntog sa COVID-19.

Ang Sputnik V gipresyohan na nga anaa sa tag $10 ang matag tupok sa tag duha ka tupok o P1,000 ang kinatibuk-an nga dosage.

Ang bakuna migamit sa adenovirus, o usa ka matang sa kagaw nga maoy magdala sa mandu sa mga sundawo sa lawas sa paghimo og dugang mas gamhanan nga sundawo batok sa SARS-CoV-2 aron kon sa higayon nga may COVID nga kagaw nga mosulod sa lawas, dali ra kining tapuk-an ug buntogon.

Ika-upat sa labing mahal ang Sinovac, nga gikan sa China, nga anaa sa $5 ang matag tupok sa duha ka tupokan, naa na sa $10 o P500.

Ang Sinovac migamit sa patay na nga kagaw (inactivated) sa COVID nga itupok sa lawas aron makasuway ang lawas sa pag-ila sa mosulod unya nga kagaw sa COVID.

Sa laing bahin, ika-upat usab ang Johnson and Johnson gipaabut pa nga mopagawas sa unsa ka epektibo sa ilang bakuna kay nagpadayon pa ang ilang katapusang hugna sa clinical trials, mibutyag na nga mapalit ang ilang bakuna sa tag $10 apan magkinahanglan lamang kini ug usa ka tupokan, o P500 lamang.

Ang Johnson and Johnson (USA) migamit sa kagaw sa sip-on aron maoy magdala sa mandu ngadto sa mga sundawo sa lawas sa paghimog mga protina nga makigbungo sa kagaw sa COVID nga mosulod unya.

Labing barato sa unom ka mga ag-una nga bakuna karon mao ang Oxford University ug sa AstraZeneca (Britain-Sweden) nga may kaepektibo nga naa sa 62-90 porsyento, nga gibaligya lamang sa $4 matag tupok ug itupok sa maka duha, o anaa ra sa tag P400.

Ang bakuna sa AstraZeneca migamit sa susamang teknolohiya sa Sputnik nga adeno-viral vector nga us aka genetically modified virus, nga maoy magtunol sa mandu ngadto sa mga sundawo sa lawas sa paghimo og mga makabuntog sa kagaw sa COVID.

Ang AstraZeneca gikataho nga una na nga misaad nga dili sila magpaginansya sa ilang bakuna isip ilang halad alang sa kalibutan nga naapektohan sa COVID. (rahc/PIA-7/Bohol)