LGU Tagbilaran, nakig-alayon na sa AstraZeneca 

alang sa pagpalit og COVID-19 vaccines 

TAGBILARAN CITY, Jan. 13 (PIA)--Ang kagamhanan sa syudad sa Tagbilaran nakig-alayon na sa pharmaceutical company sa Britanya nga AstraZeneca alang sa pagpalit og mga bakuna batok sa COVID-19. 

Sa usa ka Facebook post, si Mayor John Geesnell “Baba” Yap II miingon nga ang kagamganang syudad nakig-sabotsabot na sa nasudnong kagamhanan ug sa AstraZeneca alang sa pagpalit sa maong mga bakuna. 

“Ang City Govt of Tagbilaran nag storya na with Astrazeneca Pharmaceutical nga UK based para sa pag purchase sa Covid Vaccine,” matud pa ni Yap sa iyang FB post niadtong Martes, Enero 12, 2021. 

Matud pa sa mayor nga dili pugson sa kagamhanang syudad ang tanan aron magpabakuna batok sa COVID-19. 

Apan iyang gi-awhag ang mga frontliners ug senior citizens sa pagpahimos niining libreng bakuna. 

“Human sa mga frontliners og senior citizens, mag pre-register ta sa mga PWD (above 18 yo) sa Tagbilaran City,” matud pa sa mayor. 

Ang kagamhanang syudad nihatag na og mga pangalan isip contact persons sa nagkalain-laing barangay sa syudad diin nakabutang usab ilang mga contact numbers nga mahimong e-text sa mga persons with disability (PWD) ang ilang pangalan, PWD ID number ug address alang sa pre-registration. 

Naggahin og P10 milyon ang syudad alang sa pagpalit niining mga bakuna. 

Ang kagamhanang syudad sa Tagbilaran ang labing unang local government sa lalawigan sa Bohol nga nigahin og pondo alang sa COVID-19 vaccine. 

Sa pagkakaron, ang lalawigan sa Bohol may natalang 817 ka kumpirmadong kaso sa COVID-19 diin 14 niini ang aktibong kaso, 785 ang nangaayo na ug 18 ang namatay. (ecb/PIA7-Bohol) 

Ang kagamhanang syudad nihatag na og mga pangalan isip contact persons sa nagkalain-laing barangay sa syudad diin nakabutang usab ang contact numbers nga mahimong e-text sa mga persons with disability (PWD) ang ilang pangalan, PWD ID number ug address alang sa pre-registration alang sa libreng bakuna batok COVID-19. (Tagbilaran City Government)