Validity sa student permit, 

gi-uswag pa sa LTO taman Marso 

TAGBILARAN CITY, Jan. 13 (PIA)--Gi-uswag pa sa Land Transportation Office (LTO) ang validity sa student permits, apil na usab ang lisensya sa mga drivers ug konduktor, hangtod sa Marso 31, 2021. 

Kining ekstensyon balido lamang sa mga indibidwal nga may edad 17 hangtod 20-anyos ug apil na usab sa mga may edad 60 anyos pataas. 

Ang student permit ug lisensya sa mga driver ug konduktor niining age group gi-uswag tungod kay required sila nga magpabilin sulod sa ilang balay tungod sa gipatuman nga quarantine period tungod sa COVID-19 pandemic. 

Ubos sa Inter-Agency Task Force for the Management of Emerging Infectious Diseases Resolution No. 79, ang mga indibidwal nga may edad 15 hangtod 20-anyos, apil na usab ang mga kapin sa 60 anyos, mahimo lamang mogawas sa balay alang sa ‘essential travel.’ 

Kini na ang ikatulong higayon nga gi-uswag sa LTO ang validity sa pipila sa mga lisensya nga ilang gina-isyu tungod sa gi-uswag nga restrictions taliwala sa nasinating pandemya. (ecb/PIA7-Bohol)