Mga gobernador, mayor gawasnong makapili 

sa palitong COVID-19 vaccines – Duterte 

TAGBILARAN CITY, Jan. 15 (PIA)--Gipahayag ni Presidente Rodrigo Roa Duterte nga gawasnong makapili ang mga gobernador ug mayor kung unsa ang paliton nilang bakuna batok sa COVID-19. 

Sa gipahigayong pulong kauban ang Cabinet members niadtong Miyerkoles, Enero 13, miingon ang presidente nga mahimong mopili sa paliton nga bakuna ang nahisgotang mga opisyal sa gobyerno alang sa ilang mga nasakupan. 

“I’m now addressing to the mayors and governors. You can choose any vaccine you like to buy. Wala kaming pakialam kung ano ang pipiliin ninyo,” pahayag pa ni Duterte. 

“Maraming local government units who opted to go on their own. Sila ang magbili, may pera sila, at sila ang mamili ng kanilang vaccine or whatever,” dugang pa sa presidente. 

Matud pa nga dili pugson ang tanan nga maghiusa sa ihatag nga bakuna sa nasudnong kagamhanan. 

Dinhi sa lalawigan sa Bohol, si Dauis Mayor ug League of Municipalities of the Philippines-Bohol chapter President Marietta Sumaylo, mibutyag nga sa Enero 20, 2021 pa gitakdang meeting sa mga mayor sa lalawigan aron tukion ang isyu kalabot sa pagpalit og bakuna batok sa COVID-19. 

Sa pagkakaron, ang kagamhanang syudad sa Tagbilaran pa ang labing unang local government unit sa lalawigan nga nigahin og pondo alang sa COVID-19 vaccine. 

Gitakda nang molagda og kasabutan ang kagamhanang syudad sa Tagbilaran ug British drugmaker nga AstraZeneca sa mga mosunod nga adlaw alang sa UK-based company nga maoy mo-supply og COVID-19 vaccines alang sa dakbayan. 

Samtang ang kagamhanang probinsyal sa Bohol mipahibalo nga si Gob. Arthur Yap mi-aprobar na sa supplemental investment plan (SIP) nga nagkantidad og P100 milyon alang sa pagpalit sa COVID-19. (ecb/PIA7-Bohol) 

Sa gipahigayong pulong kauban ang Cabinet members niadtong Miyerkoles, Enero 13, miingon si Presidente Duterte nga mahimong mopili sa paliton nga bakuna batok sa COVID-19 ang mga mayor ug gobernador alang sa ilang mga nasakupan. (PCOO)