BOC nipasidaan sa publiko 

batok sa parcel/love scam 

TAGBILARAN CITY, Jan. 14 (PIA)--Nipasidaan ang Bureau of Customs (BOC) sa publiko batok sa parcel scam o love scam ilabi na karong nagkaduol na usab ang Valentine’s Day. 

Matud pa sa gipagawas nga pasidaan sa BOC, ang parcel o love scam usa ka modus operandi diin motawag o magpadala og text message o email ang usa ka consignee sa cargoes ug parcels aron mangayo og salapi isip clearance fees aron ma-release ang shipments gikan sa BOC-NAIA. 

Giingong gigamit usab sa nahisgotang modus ang pangalan sa pipila ka opisyal sa BOC-NAIA. 

“BOC NAIA has been getting an increasing number of inquiries through Facebook page messenger and assistance hotlines during these times of pandemic regarding packages being “held by Customs” which was supposedly sent to them by their “chatmates” or online friend,” matud pa sa pahayag ni District Collector Carmelita Talusan. 

Giklaro sa BOC-NAIA nga wala sila’y ginapangayo nga clearance fees o dili sila maningil og bayad alang sa customs duties ug taxes pinaagi sa telepono ug dili usab sila modawat og bayad sa mga money remittance centers o personal bank accounts. 

Matud pa nga modawat lamang ang BOC-NAIA og bayad alang sa customs duties ug taxes pinaagi sa mga authorized agent banks o BOC cashiers ug mo-isyu usab sila og official receipt alang sa maong bayad. 

Gi-awhag ang publiko nga kun makasugat og susama niini nga modus, motawag lamang sa BOC-NAIA sa ilang assistance hotlines nga 095692452626 ug 09617594067 aron dili mailad sa mga scammers. (ecb/PIA7-Bohol) 

Gi-awhag sa BOC ang publiko sa pagtawag niining mga numero kun makasugat og parcel scam o love scam ilabi na karong nagkaduol na ang Valentine’s Day aron dili mailad sa mga scammers. (BOC)