Pagsunod gihapon sa minimum health standard 

ang pangbatok sa UK variant sa Pinas – DOH 

TAGBILARAN CITY, Jan. 14 (PIA)--Gipapas sa Department of Health (DOH) ang kahadlok sa publiko kalabot sa kumpirmadong pagsulod sa UK variant sa coronavirus disease 2019 (COVID-19) sa nasod. 

Ang UK variant sa coronavirus na-detect sa usa ka Pilipino nga mipaule sa Pilipinas gikan sa United Arab Emirates niadtong Enero 7, human migawas sa nasod ug niadto sa Dubai niadtong Disyembre 27, 2020 tungod sa negosyo. 

Matud pa sa DOH nga dili angay mag-panic ang publiko kalabot sa pagkakumpirmar sa unang kaso sa bag-ong variant sa coronavirus sa nasod tungod kay wala man nausab ang ‘mode of transmission’ niini. 

Kalabot niini, gipahinumdoman sa tigpamaba sa DOH nga si Maria Rosario Vergeire ang publiko sa pagsunod gihapon sa mga gipatumang minimum health standards aron makalikay nga matakdan sa maong sakit. 

“I’d just like to remind the public, unang-una po tungkol sa variant, there is no need to panic actually kung tayo lang po ay susunod sa minimum public health standards,” pahayag pa ni Vergeire. 

“Di po siya nagbago ng transmission. ‘Yun pa rin po. Wala pong sinasabi na mas magkakaroon ng severe disease pero kung patuloy na kakalat maaaring magkaroon ng mas madaming hospitalization,” pagklaro pa sa tigpamaba sa DOH. 

Gi-awhag usab sa DOH ang mga local government units nga hingpit nga mahimong alerto ug siguradohon nga hingpit nga nasunod ang mga quarantine ug isolation protocols. 

Apil sa minimum health standard ang pagsuot og face mask, face shield, pagsunod sa physical distancing, pagbutang og alcohol sa mga kamot, paglikay sa mga lugar nga gidugok og daghang tawo, ug uban pa. (ecb/PIA7-Bohol) 

Sa pagkumpirmar sa DOH sa unang kaso sa bag-ong variant sa coronavirus sa nasod, gipahinumdoman ang publiko sa pagsunod gihapon sa mga gipatumang minimum health standards aron makalikay nga matakdan sa maong sakit. (DOH)