Online facility gilusad sa PhilHealth;

Pagkuha og PhilHealth ID ug MDR, walay bayad

TAGBILARAN CITY, Jan. 28 (PIA)--Naglusad ang Philippine Health Insurance Corporation (PhilHealth) og bag-ong online facility alang sa mga miyembro niini diin mahimong makita ang ilang contribution records.

Gipahibalo sa Philhealth nga pinaagi sa “PhilHealth Member Portal” makita ug maberipika na ang mga impormasyon sama sa pangalan, adlaw’ng natawhan, gipuy-an, ug uban pa.

Gawas niini, mahimo usab maka-download ug makapa-print og Member Data Records (MDRs) alang sa mga nanginahanglan niini.

Kinahanglan lamang nga moadto sa portal sa PhilHealth website ang usa ka miyembro aron makahimo og account.

Samtang subling gipahinumdoman usab sa PhilHealth ang mga miyembro niini nga mag-amping sa mga nikatap nga mga fixer online nga nagtanyag og serbisyo sa maong buhatan.

Giklaro sa PhilHealth nga walay bayad ang pagkuha og PhilHealth ID ug Member Data Record (MDR).

Matud pa nga hingpit nga gidili ang fixing ubos sa Ease of Doing Business and Efficient Government Service Delivery Act of 2018.

Ang bisan kinsang masakpang naghimo niini mahimong magmulta og hangtod P2 milyon o pagkabilanggo og hangtod 6 ka tuig. (ecb/PIA7-Bohol)

Giklaro sa PhilHealth nga walay bayad ang pagkuha og PhilHealth ID ug Member Data Record (MDR). (PhilHealth/PIA7-Bohol)