PIA maglusad og info drive nga magpalig-on 

sa pagsalig sa publiko sa COVID-19 vaccine 

TAGBILARAN CITY, Jan. 7 (PIA)--Ang gobyerno sa Pilipinas, pinaagi sa Philippine Information Agency (PIA), misaad nga palapdan ang pagpasabot sa publiko ug palig-onon ang pagsalig sa bakuna agi og pagpangandam sa national vaccination program sa nasod. 

Sa gipahigayong Laging Handa Briefing: COVID-19 Vaccines Explained niadtong Enero 6, si PIA Director-General Ramon Cualoping III miingon nga ang ahensya maglusad og information drive kauban sa Department of Health (DOH) ug uban pang ahensya sa gobyerno aron magdugang sa pagpasabot sa mga benepisyo sa inokasyon batok sa COVID-19. 

Kining inisyatiba naglakip sa serye sa town hall meetings, regional summits, local summits, ug dayalogo kauban sa mga healthcare workers, pribadong sektor ug local government units. 

“Our objective is to continue and improve the public uptake, the acceptance level of the public to the vaccine regardless of brands,” matud pa ni Cualoping. 

Ning bag-o lang, ang University of the Philippines-OCTA Research Group miingon nga 25% ra sa mga residente sa Metro Manila ang gustong magpabakuna batok sa sakit nga coronavirus disease. Ang nahabiling 75 porsyento nagpabiling nagduha-duha o dili magpabakuna. 

Sa pagkakaron, target sa nasudnong kagamhanan nga mapabakunahan ang 50 milyon ngadto sa 70 milyon ka mga Pilipino sulod ning tuiga. 

Si National Task Force on COVID-19 chief implementer ug vaccine czar Carlito Galvez Jr. miingon nga ang gobyerno nakig-negosasyon na sa 11 ka mga organisasyon aron makakuha og igong doses sa COVID-19 vaccines alang sa Pilipinas. 

Apil niining manufacturers ug alliances mao ang AstraZeneca, Novavax, Pfizer, Johnson & Johnson, Sinovac, Gamaleya National Center sa Russia, Moderna, Sinopharm, CanSino Biologics, Bharat Biotech, ug ang COVAX alliance sa World Health Organization. (ecb/PIA7-Bohol) 

Gipasabot ni PIA Director-General Ramon Cualoping III nga ang Laging Handa: COVID-19 Vaccines Explained nagtinguha sa paghatag og mahinungdanong impormasyon ngadto sa publiko kalabot sa National Vaccine Roadmap. (PIA)