Pilot testing sa face-to-face classes

gikansela ni PRRD

 

MANILA, Dec. 28 (PIA)--Gikansela ni Presidente Rodrigo Roa Duterte ang gitakdang pilot-testing alang sa face-to-face classes karong buwan sa Enero.

 

Kini tungod sa kahadlok sa bag-ong mutation sa coronavirus disease 2019 (COVID-19) nga unang nakita sa United Kingdom (UK) nga gituohang mas paspas makatakod.

 

Gawas sa UK, pipila ka nasod na usab ang nasudlan sa bag-ong strain sa COVID-19 sama sa Ireland, Japan, Germany, Singapore ug Malaysia.

 

Gi-anunsyo ni Presidente Duterte ang kanselasyon sa pakigpulong niya sa mga health experts ug sa Inter-Agency Task Force (IATF) for the Management of Emerging Infectious Diseases niadtong Sabado, Disyembre 26.

 

“I’m calling back the order and I will not allow face-to-face classes of children until we are through with this.  We have to know the nature of the germ that we are confronting. Wala pa tayong alam and I cannot take the risk of allowing the children,” matud pa ni Duterte.

 

Gitakda na untang ipatuman ang limitadong face-to-face classes sa sunod tuig gikan Enero 11 hangtod 23 isip parte sa pagluag sa quarantine restrictions human ang siyam ka buwang lockdown sa tibuok nasod.

 

Karong adlawa unta, Disyembre 28, ipahibalo sa publiko ang listahan sa mga tunghaan nga mosalmot sa limited face-to-face classes.

 

Kalabot sa bag-ong strain sa COVID-19, nipasidaan ang Presidente nga posibleng ibalik ang hugot nga lockdown kun kini makasulod ug mokuyanap sa Pilipinas. (ecb/PIA7-Bohol)

Gikansela ni Presidente Duterte ang una niyang direktiba ngadto sa DepEd sa pagpahigayon og face-to-face classes. (PIA)