DFA, nipasidaan batok sa mga fixer 

TAGBILARAN CITY, Dec. 28 (PIA)--Nipasidaan ang Department of Foreign Affairs (DFA) sa publiko nga dili magpatabang sa pagproseso og appointment sa pagkuha og pasaporte sa Facebook group ug ubang social media chat groups ug gikan sa dili kailang indibidwal nga nagtanyang og passport appointments services online. 

Sa gipagawas nga advisory sa DFA, giingong nakadawat sila og sumbong gikan sa ilang passport applicants nga nagpa-book og passport appointment sa tabang sa kadudahang third party o fixer apan mas daku ang gibayaran kun itandi sa aktwal nga ginasingil sa ahensya. 

Tungod niini, gitambagan sa DFA ang mga aplikante sa paggamit sa kaugalingong email address ug phone number aron madawat ang saktong detalye sa ilang appointment. 

Gi-awhag ang publiko sa pagsumbong sa mga nagproseso og online appointment sa numero sa telepono 82343488 aron maberipika ang mga personalidad nga nagpaluyo niini. 

Gipahinumdoman sa DFA ang publiko nga ang passport appointments mahimong direktang ma-book pinaagi sa https://passport.gov.ph, ug hugot nga gitambagan ang mga aplikante sa paggamit sa ilang kaugalingong email address ug mobile number aron maseguro ang ilang appointment schedule ug madawat ang application packet nga kinahanglang e-presentar atol sa appointment. (ecb/PIA7-Bohol)