Usa ka local transmission 

12 ka LSI ang may COVID-19

TAGBILARAN CITY, Bohol, Dec. 29 (PIA) -- Usa na lang ka kaso sa local transmission ug 12 ka kaso nga dala sa mga locally stranded individuals ang gisapnay sa Bohol duha ka adlaw ngadto na sa bag-ong tuig.

Kini maoy taho gikan sa Bohol Inter Agency Task Force on the management of Emerging Infectious Diseases sa ilang COVID-19 Case Map nga gipaambit sa publiko niadtong Disyembre 28, 2020.

Segun sa COVID Case Map nga gpagawas niadtong Lunes, Disyembre 28 sa may alas 6:00 sa hapon, ang usa ka kaso sa local transmission didto na lang sa Talibon samtang naa usab sa mga sulod sa mga quarantine facilities ang mga LSI nga namatikdan nga nagpositibo sa sakit nga mananakod.

Kasamtangan nga nagpaayo pa ang mga nagpositibo nga LSI sa Alicia, duha sa Bilar, usa sa Buenavista, usa sa Carmen, usa sa Corella, usa sa Dauis, usa sa San Miguel, duha sa Tagbilaran City, usa sa Tubigon ug laing usa sa Ubay. 

Sa ming-aging upat ka adlaw, siyam ka mga Bol-anon nga nagpositibo sa COVID ang nakagawas na sa mga pasilidad sa pagkwarantina kay nanga-ayo na human magnegatibo sa sakit samtang nakakwarantina. 

Human usab sa siyam ka buwan nga pagpanghasi sa nasampit nga sakit, 16 na ka kinabuhi sa mga Bol-anon ang nakalas, samtang 768 na usabka kanhi nangasakit ang karon nakauban na sa ilang mga kabahany kay naayo na.

Sa taas nga lanat sa panahon, wala pa gihapoy kaso ang Dagohoy, Sevilla, ug Valencia.

Ubay niini, gipaabut nga sa dili madugay, mohangyo na usab si Gob Arthur Yap sa mga mayor nga lugakan na usab ang estrikto nga mga sumbanan aron makalihok na og mas paspas ang ekonomiya.

Kini usab sanglit gikabaniog na nga may mga bakuna na nga mapalit batok sa sakit.

Hinuon, niining bag-o lamang namatikdan na usab ang bag-ong klase sa kagaw sa COVID-19 nga mas grabe pa nga makapanakod.

Karon, kasamtangan pa nga gipugngan ang pagpangdawat sa mga byahedor nga gikan sa Britanya ug sa mga nasud nga gikataho nga may mga kaso sa bag-ong matang sa COVID. (rahc/PIA-7/Bohol)

KOMPLETOHA ANG KWARANTINA. Alang sa mas luwas nga bag-ong tuig, giaghat ang katawhan nga magpulaw aron maseguro ng ang mga LSI nga nagkwarantina karon, dili manggawas ug mao na hinuoy kinaingnan sa pagkatag sa sakit. (PIA Bohol)