400 mil pa sa 1.4 milyonones ka

doses sa bakuna ang kaya

TAGBILARAN CITY, Bohol, Feb. 8 (PIA) -- Sa kasamtangan, 400 mil pa lamang ka tupokan (doses) sa bakuna ang ma-abut sa Bohol, kana kon wala nay lain pang local nga kagamhanan nga nagpahat alang sa pagpamalit sa bakuna alang sa ilang mga konstituwente.

Matud ni Dr. Cesar Tomas Lopez, tigpamaba sa Bohol Inter Agency Task Force (BIATF), may napahat sa kagamhanan nga Probinsyal nga igo sa ilag makaya nga 200 mil ka tupokan, samtang gitaho na usab nga ang Bohol Chamber of Commerce and Industry nga may susama usab ka kadaghanon sa bakuna nga ilang mapalit.

Nanginahanglan ang 700 mil ka mga Bol-anon nga matupokan sa bakuna aron makuha ang herd immunity nga gikinahanglan aron wala nay igo kadaghanon sa tawo nga mataptan sa kagaw nga walay igo nga panalipod.

Sa 700 mil ka Bol-anon, nanginahanglan pa ang Bohol sa labing menos 1,400,000 ka tupokan sa bakuna sa tag duha ka tupokan sa matag usa, aron makuha ang herd immunity.

Kini maoy pasiuna nga pahayag ni Bohol Inter Agency Task Force (BIATF) of the management of Emerging Infectious Diseases, pinaagi ni Dr Cesar Tomas Lpez, didto sa usa ka programa sa radio, Febrero 5.

Gipasabut ni Dr. Lopez nga bisan pa kon wala pay tataw nga brand o pangalan sa bakuna nga napili sa Bohol, dako nga punto alang sa pagpamalit niining bakuna nga gisaligan nga maoy mopatrabaho sa mga sundawo sa lawas aron maoy makigbugno sa kagaw kon mosulod kini sa lawas, magdepende usab ang desisyon sa Bohol sa presyo, ka epektibo niini, ug ang labing importante, ang pamaagi sa pagtipig niini nga dili madaut samtang ngahuwat kanus-a ikatupok.

Gitumbok niya ang bakuna sa Pfizer isip pananglitan.

Ang bakuna nga BNT 162b2, nga ginama sa Pfizer kasamtangan nga gikataho nga labing epektibo nga bakuna nga may 95% ka epektibo batok sa coronavirus disease.

Kini, una nga nga gimantala nga mapalit sa tag $20 matag tupok o $40 alang sa duha ka tupok, apan kini nga presyo, mahimong momahal pa o mo barato, depende sa kasabutan sa mga gobyerno nga mamalit sa binulto, o subay sa lagda sa World Health Organization alang sa pagpabahinbahin sa bakuna aron walay nanginalanglan nga mahikawan.

Ang nakalisud sa bakuna sa Pfizer, kay nagkinahanglan kini sa storage facility nga mas bugnaw pa kay sa ordinary nga freezer, ug wala kini nga matang sa freezer sa Bohol.

Ang bakuna sa Pfizer nagkinahanglang nga kaduhaitupok, 21 ka adlaw ang gintang gikan sa unang pagtupok, nga nagpasabut nga sa taas nga lanat sa pagpatusok sa bakuna, may daku nga posibilidad nga kining bahuna tipigan una samtang nagpaabut sa ika 2 nga pagtupok.

Ang bakuna sa Pfizer, parehas sa bakuna nga mugna sa Moderna: ang panginahanglan nga kini matipigan sa mas bugnaw nga tipiganan, maoy nakapabugnaw sa mga tinugyanan sa pagpalit niini.

Butyag sa mananambal nga spokesperson sa BIATF, kasamtangan nga gitan-aw sa Pilipinas ang bakuna sa Astra Zeneca, nga may 76 porsyento nga makamaayo ug mahimo nga tipigan sulod sa ordinary nga freezer, mas sayun na nga ipang-apud-apod sa mga vaccine centers.

Dugang ni Dr. Lopez, ang bakuna nga dili mapahimutang sa saktong tipiganan, madaut ug mahimo nga wala nay epekto.

Gipaabut usab sa kagamhanan ang bakuna sa SinoVac, apan dason ni Dr. Lopez, wala pa kini makakuha sa Emergency Use Authority sa Pilipinas bisan pa kon anaa na kini sa 51 ngadto sa 91 porsyento nga epektibo sa mga medical trials sa China. (rahc/PIA-7/Bohol)