PLO buot pa-aksyonan ni Clarito 

ang pulis nga nakapatakod

TAGBILARAN CITY, Bohol, Feb. 8 (PIA) -- Buot ang Provincial Legal Officer sa Kapitolyo nga pa-aksyonan sa Hepe sa Kapolisan sa Bohol ug hatagan sa disiplina ang pulis nga sa iyang katahap, maoy naka-ingon sa pagdagsang sa kaso sa coronavirus disease sa Dauis ug mamahimong sa pila na usab ka dapit sa Bohol.

Si Provincial Legal Officer Atty. Nilo Ahat namahayag nga sanglit ang tinubdan sa local transmission usa man ka opisyal sa kapulisan nga gipasanginlan nga wala magtagad sa sakto ug tukma nga protocols, ang Police Provincial Director kinahangang molihok subay sa mga lagda sa pagdisiplina sa kapolisan.

Dugang ni Atty Ahat nga kinahanglang ang Police Director mao nay mahimo nga reklamante sa iyang katungod, ug magsugod nga sa pagpataktak sa nahisgutan nga pulis, kon gikinahanglan.

Kahinumduman nga gisawhan sa mga huhungihong nga may siyam ka mga kapolisan nga gikan sa laing lugar ang nadugang sa kapolisan sa Dauis, aron pagbantay sa lungsod sa pagpatuman sa quarantine protocols sa ilang pagsaulog sa kapistahan sa Dauis.

May nga wala makompirmar nga taho nga ang mga pulis nga nangabut, wala na iagi pa og kwarantina ug giigon nga mideresto sa ilang duty sa pista.

Apan, sa pagsubay sa COVID Case Map sa Bohol, walay higayon nga may nataho nga APOR nga nangabut sa Dauis.

Kini usab samtang ang lungsod sa Dauis karon mao’y nanguna sa mga kaso sa COVID-19.

Sa Covid 19 reports nga gipagawas sa Bohol InterAgency task Force Febrero 7, 2020 sa alas 9:00 sa buntag, 21 ka kaso ang local transmission nga natala sa Dauis, samtang may possible pa nga 6 nga madugang niini isip mga bag-ong kaso sa COVID.

Kini usab samtang ang Bohol may kinatibuk-ang 82 ka kaso nga natala sa nahisgutang adlaw.

Sa 82 ka kaso, Feb 7, 64% niini, o 53 ka kaso ang dala sa local transmission, samtang may 20 ka kaso gikan sa mga Authorized Persons Outside Residence, Locally Stranded Individuals ug nga namauli nga Overseas Filipino Workers.

Sa natala nga pagdagsang sa kaso sa Dauis, gipasalig ni Dr Cesar Tomas Lopez ang spokesperson sa BIATF nga gihimo na sa kagamhanan ang susama nga paspas ug makuti nga contact tracing ug isolation protocols samtang ang Department of Health, Operation Center sa Provincial Health Office ug ang local nga kagamhanan sa Dauis, nagpabilin nga on top sa sitwasyon.

Kini samtang gikataho sa milabay nga mga adlaw ang ika 19 na ka mga Bol-anon ang namatay sa COVID sukad sa pagsugod sa pagpanghasi niini niadtong sayo nga mga buwan sa 2020.

Ang katapusang biktima, gikataho nga nagagikan sa Alicia ug usa ka ming-uli nga Overseas Filipino Worker. (rahc/PIA-7/Bohol)