Bag-ong hepe sa Bien Unido, mitrabaho 

dayun batok COVID, krimenalidad

TAGBILARAN CITY, Bohol, Feb. 1 (PIA) -- Mingtugpa dayon ang bag-ong napuli nga hepe sa Bien Unido sa hiniusa nga kalihukan nga naglakip sa pagtugyan sa katungdanan, pagsubo sa bag-ong sakyanan sa kapolisan, pagpamati sa sitwasyon sa mga lagda sa pakigbatok sa coronavirus disease (COVID) ug ang pagtambong sa Municipal Peace and Order Council Meeting, Enero 26 ug 27 didto sa nahisgutan nga lungsod.

Si Police Lieutenant Marjun Cagogo Jr., mingdawat sa responsibilidad isip hepe sa kapolisan sa labing bata nga lungsod sa Bohol, isip puli kang Police Captain Lito Rosales, kinsa mingtapos sa iyang pangalagad sa lungsod nga gitiman-an sa epektibo nga pagdumala sa katawhan sa panahon kanus-a nanghasi ang coronavirus didto sa isla nga barangay sa Malingin.

Ang pagtugyan sa responsibilidad sa kapolisan gisaksihan usab nila Mayor Rene Borenaga ug Bise mayor Ramon Arsenal, uban usab ang mag sakop sa Sangguniang Bayan, Enero 26, 2021.

Init usab ang pagdawat sa lungsod ni Lt. Cagogo, kinsa ming-abut sa lungsod dihang naghimo sa iyang kaugalingon opisyal nga buhat si Captain Rosales kinsa maoy nanguna sa kapolisan sa pagpatuman sa Road Clearing Program sa kagamhanan.

Uban sa Department of Interior and Local Government, gipatuman sa PNP ang Road Clearing aron pagpapaspas sa mga sakyanan nga nakabara sa mga kilid sa dala ug magpahinay sa dagan sa trapiko.

“Nalipay kita samtang atong gipapas-an sa atong bag-ong hepe sa kapolisan ang dili sayun nga tahas: ang pagseguro sa pagpatunhay sa kahapsay ug kalinaw sa lungsod aron dinhi maghimo og salag ang mga negosyante nga nakakita sa daku nga potensyal sa Bien Unido, alang sa negosyo ug linaw nga pagpuyo,” matud pa ni Mayor Borenaga.

Sa susama nga adlaw, gipabalaan usab sa lungsod ang bag-ong police patrol car, nga nakuha sa lungsod.

Kahinumduman nga ang Campo Dagohoy, kauban sa League of Municipalities of the Philippines Bohol Chapter pinaagi ni Mayor Mirriam Sumaylo, una na nga mipadayag nga may 10 ka bag-o nga Toyota Hilux patrol cars nga nakuha ang Bohol.

Ang Bien Unido, kinsa usa sa napulo ka lungsod, ming-claim sa ilang bag-ong patrol car gikan sa Regional Office 7 niadtong imaging semana, segun pa ni Manuelito Item, Municipal Public Information Officer.

Ang Bien Unido, parehas nga nakakuha sa patrol car sama sa Dauis, Panglao, Alburquerque, Loay, Garcia-Hernandez, Trinidad, Talibon, San Isidro ug Ubay.

Sa pagkasunod adlaw, Enero 27, giluho dayon sa bag-ong hepe sa kapolisan ang iyang pantalon alang sa iyang buhat opisyal: ang pag-tambong sa Municipal Peace and Order Council ug Municipal Anti Drug Abuse Council Meeting (MPOC/MADAC).

Matud sa mayor, importante sa unang adlaw sa opisyal nga trabaho sa hepe ang sayran ang matuod nga hulagway sa kahapsay’g kalinaw aron may ikatandi nga datus nga iyang kabasehan sa performance sa local nga kapolisan.

Ang MPOC usab talagsaon nga higayon sa lungsod nga ikahimamat ang bag-ong hepe kay lakip sa mga motambong sa tigum ang mga kapitan sa tanan nga barangay sa lungsod.

Milaum hinuon ang mga kapitan nga ila pang mas ikahimamat ang hepe alang sa tumbok nilang mga suliran, aron may ikatambag ang pulis pagsolbad sa mga suliran sa kahusay ug kalinaw. (rahc/PIA-7/Bohol)

COMMAND CONFERENCE. Aron ikabagat ig mahiusa ang kampanya sa mga ahensya sa kagamhanan didto sa Bien Unido, mitambong ang Philippine National Police sa tigum nga gipatawag ni Mayor Rene Borenaga aron himoon ang lungsod nga lugar pugaran sa kahusay ug kalinaw. (PIA Bohol/MPIO Manuelito Item)

GIPRESENTAR ANG BAG-ONG HEPE. Didto sa hiniusang MPOC ug MADAC sa lungsod nga gitambongan sa mga kapitan sa barangay sa Bien Unido, gipailaila ni Capt. Lito Rosales ang mipuli kaniya, aron usab mahimamat sa mga kapitan ug mapasayon ang ilang mga programa sa kahapsay ug kalinaw. (PIA Bohol/MPIO Manuelito Item)