BFAR, nipasidaan batok sa
makahilo nga alimango

 

TAGBILARAN CITY, Feb. 23 (PIA)--Nipasidaan ang Bureau of Fisheries and Aquatic Resources (BFAR) batok sa pagkaon sa usa  ka klase sa alimango nga gitawag nga “kuret”.

 

Kini human nasusi sa BFAR nga ang maong alimango ang nakaingon sa pagkahilo sa duha  ka pamilya diin duha  ka batang magsuon ang namatay human nikaon sa kuret sa Barangay Tangatan, Sta. Ana, Cagayan.

 

Matud pa sa advisory sa BFAR, ang maong alimango nga may scientific name nga ‘zozymus aenus’ o devil reef crab adunay dalang toxins o hilo nga dili angay kaonon.

 

Kining mga species nga dili mahimong kaonon maila sa mga wala naandan nga hitsura.

 

Apil na niini ang mga daghang kolok o adunay batik- batik nga shell o sa panit.

 

Pipila sa mga sintomas sa pagkahilo mao ang pagkamanhid sa dila, paralysis sa kamot ug paa ug lisod sa pagginhawa. (ecb/PIA7-Bohol)

DEVIL REEF CRAB. Makahilo, segun pa sa BFAR, ang kuret o devil reef crab maong dili gyud kaonon. (PIA Bohol)