Pinas, di ibutang sa MGCQ kun

walay COVID bakuna – PRRD

 

MANILA, Feb. 23 (PIA)--Nihatag na sa iyang direktiba si Presidente Rodrigo Roa Duterte sa iyang gabinete nga dili ipaubos ang tibuok Pilipinas sa Modified General Community Quarantine (MGCQ) gawas na lamang kun magsugod na’g rollout ang bakuna.

 

“President Rodrigo Roa Duterte gave his directive to the Cabinet that the Philippines would not be placed under Modified General Community Quarantine (MGCQ) unless there is a rollout of vaccines,” matud pa ni presidential spokesperson Harry Roque sa usa  ka pahayag niadtong Lunes sa gabii.

 

Matud pa sa kalihim nga giila sa Presidente ang kamahinungdanon sa pagbukas og balik sa ekonomiya ug epekto niini sa panginabuhian sa mga Pilipino, apan mas mahinungdanon matud pa ang kahimsog ug kaluwasan sa publiko.

 

Sa laing bahin, gusto ni Presidente Duterte nga magsugod na ang pagbakuna sa mas daling panahon aron mapaluagan na ang community quarantine sa nasod.

 

Kahinumdoman nga ang National Economic Development Authority (NEDA) ang nisugyot nga ipaubos na sa pinakaluag nga quarantine status ang tibuok nasod sugod sa Marso 1 aron makabangon na ang ekonomiya.

 

Gawas niini, gikataho usab nga daghang mga mayor sa kaulohan ang pabor na sa pagpaubos sa MGCQ sa Marso. (ecb/PIA7-Bohol)

Nihatag na og direktiba si Presidente Duterte sa iyang gabinete nga dili ipaubos ang tibuok Pilipinas sa Modified General Community Quarantine (MGCQ) gawas na lamang kun magsugod na’g rollout ang bakuna. (PCOO)