Bohol, apil sa 3 ka labing dagha’g

‘arrivals’ bisa'g may COVID

TAGBILARAN CITY, Feb. 23 (PIA) -- Apil ang Bohol sa top three nga mga destinasyon sa turista nga gibalikan na karon sa mga turista bisan pa sa hulga sa corona virus disease (COVID-19).

Kini maoy gibutyag ni Atty . Antonette Velasco-Allones, Chief Operating Officer sa Tourism Promotions Board sa Department of Tourism sa iyang labing bag-ong pahayag dungan sa paglusad sa Balik sa Bohol Online Sale, sa imaging semana.

Matud ni Atty. Allones, ang Bohol ug ang Palawan ang duha ka mga lalawigan nga nag-ilisay sa ika duha ug ikatulo nga pwesto sa mga lalawigan nga may labing daghan na nga namalik nga mga turista bisan pa niining panahon sa pagpugong sa pagbyahe sa katawhan pagpugong sa pagkatag sa COVID.

"Numero uno pa gihapon ang Boracay, isla nga paraiso sa mga mamakasyonay, ug usa sa mga pangturismong lugar nga unang opisyal nga gibuksan alang sa domestic tourism," dugang niya.

Kini usab samtang positibo ang mga tinugyanan sa Bohol Tourism Office nga nindot na ang mga figures nga gipakita sa tourism arrivals sa Bohol.

Kahinumduman nga unang nahidangat ang mga turista sa Bohol human gisirad-an ang lalawigan sa mga mopasulod dinhi niadtong Marso 16, 2020, dihang gipagawas na sa Bohol ang pormal nga pagbukas niini pagdawat sa mga motambong sa mga meetings, incentives, conventions ug exhibits.

Sa taho sa Bohol Tourism Office, gikan sa 187 ka mga turista nga misalmot sa Philippine Travel Exchange ngadto sa pagpasulod na usab niadtong mga free ug independent travelers nga dili na kinahanglang dagkong grupo, gikan sa 187 ka arrivals sa Nobyembre 15 ngadto sa Disyembre 20, misaka ngadto sa 540 ka mga turista ang misulod.

Niining mga panahona, gipasubay sa mga taga Bohol ang Bohol Bubble Tourism alang sa mga mosulod.

Kini ngapasabut nga basta makapakita sila sa negatibo nga resulta sa COVID test pinaagi sa Reverse Transcription Polymerase Chain Reaction (RT-PCR) nga nakuha 72 oras sa dili pa sila mobyahe paingon sa Bohol, makaanhi na sila basta dili usab molapas sa 5 ka adlaw.

Samtang nia dinhi, dili sila mahimong mogawas sa mga gipangpuy-an nga hotel, resorts ug accommodation facilities kon dili kauban sa mga tinugyanan nga gitugotan sa DOT ug sa local nga kagamhanan.

Dili usab sila mahimong mokanaug ug mogawas sa ilang giruta nga adto-an, segun sa gipahiluna sa ilang DOT accredited tour agent.

Segun sa pamahayag ni Joanne Mendez Pinat, tinugyanan sa BOT, sa sunod nga mga adlaw, o gikan sa Disyembre 21 ngadto sa Disyembre 31, gidawat sa Bohol ang pagsulod sa 540 ka mga turista, lakip na ang gitugtan nga pagsulod nga free and independent travellers (FITs).

Niining mga petsa nga nahisgutan nahitabo dinhi sa Bohol ang pagpanawat sa mga tourism industry workers, tour agents, travel operators ug tourism allied service providers alang sa us aka familiarization tour aron ilang sayran kon unsa na ang bag-ong mga patakaran sa pagbyahe sa Bohol sa bag-ong normal, aron usab ilang ikapamaligya ngadto sa mga turista.

Dugang ni Pinat, gikan sa Enero 1 ngadto sa 31, miabut ang tourist arrivals sa 538, apan human niini, mas gipasayon pa pinaagi sa mga execiutive orders ang pagsulod sa Bohol.

Niini, gikan sa Pebrero 1 ngadto sa Pebrero 11, miabut sa 636 ang naabut.

Kini wala pa magsukip sa mga miabut niadtong long holidays sa Chinese New Year, Valentine's Day ug sa mga moabut sa lain na usab nga long holidays sa EDSA Revolution Anniversary sa katapusan sa buwan.

Tug-an ni Pinat, niadtong Pebrero 2 lamang, sobre sa 200 ang turIsta nga miabut sa Bohol, samtang milaum sila sa BTO nga mas modaghan pa ang mamalit sa Balik sa Bohol Online Sale. (rahc/PIA-7/Bohol)

HINAYHINAY APAN KANUNAY. Hinayhinay na og pamalik ang mga turista dinhi human gipaablihan na sa kagamhanan ang mga industriya nga makatampo sa pagbangon sa ekonomiya nga nalusno sa COVID-19. Sa katapusang mga semana sa sa 2020, natandi na ang nagkadaghan nga nangabut nga turista nga halos nagpilipilo ang kadaghanon matag quincina. (rahc/PIA-7/Bohol)

NAGKADAGHAN. Sa Pebrero 12 lamang, kapin sa 200 ka turista ang nangabut sa Bohol, dala kini sa nagsingabut nga Valentine's Day, segun pa ni Joanne Pinat. Mas modaghan pa kining arrivals sa Pebrero tungod sa nagsingabut nga long weekend sa EDSA anniversary ug sa nagsingabut nga Balik sa Bohol sale, dugang niya. (PIA Bohol)