Holiday pay karong Pebrero,

gipahinumdom sa DOLE

 

TAGBILARAN CITY, Feb. 10 (PIA)--Gipahinumdom sa Department of Labor and Employment (DOLE) sa mga employer ang saktong bayad sa ilang mga empleyado nga motrabaho sa gitakdang mga holidays karong buwan sa Pebrero.

 

Nipagawas ang ahensya sa Labor Advisory No. 2, series of 2021 nga naghatag sa saktong pagbayad sa suholan alang sa gideklarang special non-working holiday sa Pebrero 12  o pagsaulog sa Chinese New Year ug ika-25 nga pagtimaan sa  anibersaryo sa EDSA People Power Revolution.

 

Gipahinumdoman sa DOLE ang mga empleyado nga mosulod sa maong mga adlaw nga holidays nga angay silang mabayran og dugang 30 porsyento sa ilang basic salary sa unang walo ka oras.

 

Matud pa nga ang ilang basic wage angay naka-multiply og 130 percent plus COLA.

 

Samtang ‘no work, no pay’ usab ang dili mosulod nga empleyado sa maong mga adlaw gawas na lamang kun adunay paborableng polisiya ang usa  ka kompanya.

 

Dugang 30 porsyento sa iyang hourly rate usab ang idugang sa suholan sa mga empleyado kun molapas sa walo ka oras nga pagtrabaho.

 

Apan kun matunong nga adlaw sa iyang pagpahulay o day-off ug mosulod sa adlaw nga holiday, bayran og dugang 50 porsyento sa iyang basic wage sa unang walo ka oras ug kun molapas pa sa oras o overtime, dugang 30 porsyento usab ang idugang sa hourly rate sa empleyado.

 

Mao nga ang komputasyon mahimong  hourly rate sa  basic wage x 150 percent x 130 percent x pila ka oras nga pagtrabaho. (ecb/PIA7-Bohol)