Mga batang 12 anyos paubos, bawal nang

molingkod sa atubangan sa sakyanan sugod Peb.2

TAGBILARAN CITY, Feb. 1 (PIA)--Sugod Pebrero 2, 2021, hingpit nang ipatuman sa Land Transportation Office (LTO) ang Child Car Seat Law.

Nagpasabot kini nga ang mga batang may edad 12 anyos paubos, dili na mahimong molingkod sa front passenger seat sa bisan unsang sakyanan.

Tugotan lamang silang makalingkod sa front seat kun maabot nila ang 4’11’’ height requirement.

Sa usa ka pahayag, gipasabot ni LTO Law Enforcement Service Deputy Director Roberto Valera nga nakalatid usab sa balaod nga kinahanglan nang gamiton ang child restraint system (CRS) sa mga sakyanan sa mga pasaherong bata gawas nga angay usab sila nga naka-seatbealt.

Matud pa ni Valera nga alang na usab kini sa kaluwasan sa mga bata sa mga aksidente o sa kalit nga pag-preno sa drayber.

Apan giklaro niini nga dili pa sila manakop sa mga molapas niining balaod hangtod sa mosunod nga unom ka buwan ug ang himuon lamang sa mga enforcers mao nga ipahinumdom kining bag-ong balaod.

Dungan sa pagpahinumdom sa LTO ang ilang information campaign kalabot sa balaod ug pagpanghatag og mga information materials.

Ubos sa implementing rules and regulations, ang mga drayber nga molapas sa balaod, pamultahon og P1,000 sa unang paglapas, P2,000 sa ikaduhang paglapas ug P3,000 ug usa ka tuig nga suspensyon sa driver’s license alang sa ikatulo ug mga mosunod nga paglapas. (ecb/PIA7-Bohol)