Mga bag-ong kondisyon sa pagsulod sa mga

langyaw sa nasod, gitakda sa gobyerno

MANILA, Jan. 29 (PIA)--Nagtakda og pipila ka bag-ong kondisyon ang gobyerno sa pagsulod sa mga langyaw sa nasod taliwala sa travel restrictions aron mapugngan ang pagkatap sa bag-ong COVID-19 variant sa Pilipinas.

Kini ang gipahibalo ni Presidentail Spokesperson Kalihim Harry Roque diin gibutyag niini nga kinahanglan na sa mga foreign travelers ang pre-booking hotels alang sa quarantine purposes ug mopaubos sa reverse transcription-polymerase chain reaction (RT-PCR) test, unom ka adlaw human sa ilang pag-abot.

“These foreign nationals should also have pre-booked accommodation for at least seven nights in an accredited quarantine hotel or facility. They shall also be subject to Covid-19 testing at the quarantine hotel or facility on the sixth day from the date of their arrival,” pasabot pa ni Roque.

Matud pa sa Kalihim nga epektibo kini sugod Pebrero 1, 2021.

“The entry of these foreign nationals will be subject to the maximum capacity of inbound passengers at the port and date of entry,” dugang pa sa Kalihim.

Gitumbok ni Roque nga gihatagan na usab og kamanduan ang Bureau of Immigration sa pagmugna og sumbanan alang sa himuong pagpatuman niini.

Matud pa sa Kalihim nga kining bag-ong lakang isip pagsunod sa bag-ong polisiya sa Inter-Agency Task Force (IATF).

Kahinumdoman nga gipatuman ang travel ban gikan sa mga nasod sa UK, Denmark, Ireland, Japan, Australia, Israel, the Netherlands, China, Hong Kong, Switzerland, France, Germany, Iceland, Italy, Lebanon, Singapore, Sweden, South Korea, South Africa, Canada, Spain, the United States, Portugal, India, Finland, Norway, Jordan, Brazil, Australia, Pakistan, Jamaica, Luxembourg, Oman, United Arab Emirates, ug Czech Republic. (ecb/PIA7-Bohol)

PITO KA ADLAW NGA PRE BOOKING. Alang sa mga langyaw nga mosulod sa Pilipinas, kinahanglan nga may nasanut na sila nga hotel alang sa pito ka gabii niya nga kwarantina didto, segun sa bag-ong lagda sa IATF. (rahc/PIA-7/Bohol) 

SUKWAHI NA KANIADTO. Sa wala pay hulga sa COVID-19, walay pili ang Bohol sa pagdawat sa mga turista, apan sa kadako usab sa kadaut kon maydili mapugngan nga pagpanakodtakod sa sakit dinhi, mas alkanse ang ekonomiya, mao nga mas maayo pa gyud gihapon ang mangandam. (rahc/PIA Bohol)