5,140 doses sa bakuna sa

AstraZeneca niabot sa Bohol

TAGBILARAN CITY, Mar. 15 (PIA)--Ang lalawigan sa Bohol nakadawat na sa 5,140 ka doses sa bakuna sa AstraZeneca niadtong Domingo, Marso 14, 2021.

Sa iyang Facebook post, si Gob. Arthur Yap nipahibalo usab nga ang Bohol nakadawat usab og 1,340 ka doses sa Sinovac gikan sa Department of Health (DOH) sa Central Visayas.

“Ang tanang hospital (government ug private) sa Bohol ang mga benepisaryo niini. Mapasalamaton ta sa DOH sa paghatag ug libreng bakuna para sa atong medical frontliners sa lalawigang Bol-anon. Kasamtangan nga gi-store ang mga bakuna sa PHO Cold Chain Facility ug ato kining ipang-apod apod sa mga tambalanan sulod sa tulo ka adlaw, matud pa ni Yap.

Niadtong Marso 6, gisugdan sa lalawigan sa Bohol ang pagpamakuna batok COVID-19 gamit ang bakuna sa Sinovac didto sa Gov. Celestino Gallares Memorial Hospital (GCGMH) sa syudad sa Tagbilaran.

Nikabat sa 2,860 ka vials sa Sinovac ang niabot sa Bohol niadtong adlawa.

Nanawagan si Yap sa publiko sa pagpadayon nga pagsunod sa minimum health standards samtang ang lalawigan nagpaabot pa sa dugang alokasyon sa mga bakuna gikan sa DOH.

“Ang padayong pag-abot sa mga bakuna nagpasabot nga nagpadayon ang atong roll-out sa pagpamakuna pinaagi sa DOH. Apan, sa gihapon, dili ta angay mokumpyansa samtang magpaabot ta sa dugang alokasyon sa bakuna alang sa katawhang Bol-anon.

Atong awhag sa tanan, sundon gihapon nato ang minimum health standards kanunay”, panawagan pa sa gobernador.

Mga 43,678 ka frontliners sa Bohol ang naapil sa priority list niini alang sa mass vaccination program batok sa COVID-19 diin mga 32,000 niini naglakip sa mga barangay health workers, base sa listahan nga giduso sa Bohol Inter-Agency Task Force (BIATF) ngadto sa mga awtoridad sa panglawas sa kaolohan. (ecb/PIA7-Bohol)

Mga 5,140 ka doses sa bakuna sa AstraZeneca ang niabot sa lalawigan sa Bohol niadtong Domingo sa buntag, Marso 14, 2021. (Gov. Art Yap FB)