Prosperity Teams, i-deploy

sa 4 ka munisipalidad sa Bohol

TAGBILARAN CITY, Mar. 16 (PIA)--Ang Kagamhanang Probinsyal sa Bohol kauban sa 47th Infantry (Katapatan) Battalion ug Philippine National Police (PNP) nipahigayon og Pre-Deployment Briefing ug Send-off Ceremony ngadto sa Prosperity Team ubos sa Community Development Program niadtong Lunes, Marso 15, 2021 nga gipahigayon sa Ceremonial Hall sa Bohol Provincial Capitol, ning syudad sa Tagbilaran.

Ang team gilangkoban sa community organizers sa Kagamhanang Probinsyal sa Bohol, PNP ug Community Support Team sa Philippine Army.

Ang maong kalihokan gitambongan ni Gob. Arthur Yap ug apil na usab sa mga opisyal sa nagkalain-laing lokal ug nasodnon nga ahensya.

Ipang-deploy ang mga teams sa mga munisipalidad sa Catigbian, Balilihan, Bilar ug Sevilla. Magpabilin sila sa mga barangay aron makiglambigit sa mga residente aron matino ang nag-una nilang mga panginahanglan nga posibleng pahimuslan sa komunistang teroristang grupo.

Atol sa gipahigayong send-off ceremony, si Yap mipadayag sa iyang panghunahuna kalabot sa kahimtang karon sa lalawigan. Gihisgotan usab sa gobernador nga gawas sa pakigbisog sa Covid-19 pandemic, may laing virus nga nagdagan na sa labaw sa 52 ka tuig nga mao ang insurhensya nga maoy giatubang sa nasod hangtod karon.

Gawas niini, gipadayag usab sa gobernador ang iyang bug-os nga suporta sa mga inisyatibo sa kampanya sa kalinaw ug mi-awhag sa tanang sektor ug hingtungdang mga ahensya sa pagsuporta sa Prosperity Team agi og pagsubay sa Community Support Program sa Philippine Army.

Aron masugdan ang inisyatiba, si Ltc Allan J Tabudlo, ang Battalion Commander sa 47IB, mipasiugda sa kamahinungdanon sa CSP sa pagprotehir sa katawhan gikan sa Communist Terrorist Group (CTGs).

"The value of CSP is an opportunity to reach out the community and support the LGU in sustaining peace and development that deserves by every Boholanos", matud pa ni Tabudlo.

Nipasalig kini nga ang army sa Bohol magpabiling mosuporta sa bisan unsang programa sa kalinaw ug kalamboan nga mapahimoslan sa komunidad. (ecb/PIA7-Bohol)

Send-off ceremony sa Prosperity Team nga gilangkoban sa community organizers sa Kagamhanang Probinsyal sa Bohol, PNP ug Community Support Team sa Philippine Army nga gipahigayon niadtong Lunes, Marso 15, 2021 sa Bohol Provincial Capitol, syudad sa Tagbilaran. (Katapatan Battalion - 47IB FB)