DepEd, gi-uswag ang school year

hangtod sa Hulyo 10, 2021

 

TAGBILARAN CITY, Mar. 3 (PIA)--Gi-uswag sa Department of Education (DepEd) ang school year alang sa basic education level hangtod sa Hulyo 10.

 

Sa usa  ka kamanduan, miingon si DepEd Kalihim Leonor Briones nga natumbok sa departamento ang mga learning gaps sa mga estudyante human ang padayon nilang pag-monitor sa implementasyon sa distance learning.

 

Gawas niini, gihatagan usab og dugang ‘instructional time’ ang mga magtutudlo alang sa nagkalain-laing learning delivery modalities.

 

“These learning gaps are attributable to reduced academic opportunities at home and substantial loss of live contact with teachers,” matud pa ni Briones.

 

Base sa kamanduan, gisibug sa DepEd ang third grading period ngadto sa Mayo 15 gikan Marso 22, samtang ang fourth quarter sa Hulyo 10 gikan sa Mayo 17.

 

Natapos niadtong Pebrero 27 ang second quarter.

 

Samtang orihinan nga gitakda ang pagtapos sa school year sa Hunyo 11.

 

Gikan Marso 1 hangtod 12, magpahigayon ang mga tunghaan og intervention ug remediation activities alang sa mga estudyante.

 

Sa Marso 15 hangtod 19 usab motambong sa usa  ka professional development program nga gi-norganisa sa mga eskwelahan o lain pang mga tukmang units sa DepEd ang mga magtutudlo.

 

Nahiapil sa bag-ong polisiya ang tanang mga pampublikong elementarya ug sekondaryang tunghaan sa tibuok nasod.

 

Samtang ang mga pribadong eskwelahan, technical and vocational institutions, ug higher education institutions nga nagtanyag og basic education gi-awhag lamang nga ipatuman ang guidelines sa ahensya.

 

Samtang dili pa sigurado sa pagkakaron kun mub-an sa bag-ong polisiya ang summer break sa mga estudyante. (ecb/PIA7-Bohol)

Nipagawas ang DepEd sa DO 012, s. 2021, nga naglatid sa adjustments sa SY 2020-2021 school calendar sa mga pampublikong tunghaan aron matabangan ang mga estudyante nga maabot ang required essential learning competencies tungod na usab sa mga limitasyon sa distance learning. Gawas niini, gihatagan usab og dugang instructional time ang mga magtutudlo alang sa nagkalain-laing learning delivery modalities. (DepEd/PIA7-Bohol)