Pagtanggal sa PNP travel authority, medical 

certificate sa pagbyahe, gidepensaan sa DILG

 

TAGBILARAN CITY, Mar. 2 (PIA)--Gidepensaan sa Department of the Interior and Local Government (DILG) ang desisyon sa Inter-Agency Task Force on Emerging Infectious Diseases na pagtanggal sa PNP travel authority ug medical certificate nga requirement sa mga pagbyahe sa nasod.

 

Sa usa  ka pahayag, gipasabot ni DILG Undersecretary Jonathan Malaya nga ang resolusyon sa IATF nga nagpatuman sa streamlined protocols alang sa mga local government units (LGUs), gihimo sa DILG nga may koordinasyon sa PNP ug mga local chief executives sa tibuok nasod.

 

Giklaro usab ni Malaya nga ang PCR test wala bisan kanus-a nahimong requirement sa nasudnong kagamhanan. Gihimo lang kini sa ubang LGUs.

 

Sa bag-ong protocols, mahimo pa gihapong i-require ang PCR test sa LGU sa padungan nga lugar apan dili na kinahanglan ang Antigen o rapid tests isip requirement sa pagbyahe.

 

Matud pa nga dili na usab kinahanglan nga ipaubos pa sa quarantine facilities ang mga travelers gawas na lamang kun magpakita kini og mga sintomas pag-abot sa padungan nga lugar.

 

Niadtong Lunes, Marso 1, gi-kumpirmar sa DILG nga ang travel authority gikan sa PNP ug ang medical certificate gikan sa LGU health office dili na required sa pagbyahe human gi-aprobahan sa IATF-MEID ang hiniusang national travel protocols sa land, air, ug sea nga gi-rekomendar sa departmento.

 

Nakadawat kini og pagsaway gikan kang Bise Presidente Leni Robredo tungod kay matud pa posibleng hinungdan lang kuno kini sa pagsaka sa mga kaso sa COVID-19. (ecb/PIA7-Bohol)