Coco Levy Trust Fund Act,

gilagdaan na ni PRRD

 

TAGBILARAN CITY, Mar. 1 (PIA)--Gilagdaan na ni Presidente Rodrigo Roa Duterte isip hingpit nang balaod ang Coco Levy Trust Fund Act nga magsiguro sa pondo alang sa industriya sa mga mag-uuma sa lubi.

 

Ubos sa Republic Act No. 11524, i-dispose sa gobyerno ang P75 bilyong kantidad sa coco levy assets sa mosunod nga lima ka tuig aron matukod ang trust fund alang sa kaayohan sa mga mag-uuma sa lubi ug kaugmaran sa industriya.

 

Ang bag-ong balaod nga giila isip “Coconut Farmers and Industry Trust Fund Act,” gipaabot nga maghatag og benepisyo sa mga mag-uuma og lubi ug sa mga nanag-iya og dili molapas sa lima ka ektarya sa coconut farm.

 

Gitakda ubos niining bag-ong balaod ang pagmugna og coconut farmers and industry development plan nga mag-obliga usab sa Philippine Coconut Authority (PCA) nga mokonsulta sa mga mag-uuma sa lubi ug sa ilang mga organisasyon ug uban pang grupo sa pagpatuman sa mga polisiya alang sa kalamboan ug rehabilitasyon sa industriya sulod sa 50 ka tuig.

 

Kinahanglang mosunod ang PCA sa mga katuyoan nga naglakip sa pagpasaka sa produksyon ug kita sa mga mag-uuma sa lubi, pagpagaan sa kalisod, edukasyon ug sosyal nga pagkaparehas, ug rehabilitasyon, modernasyon sa industriya sa lubi paingon sa maayong produksyon.

 

Samtang kinahanglan usab nahisulod sa plano sa nasudnong programa ang community-based enterprises, sosyal nga pagprotekta sa mga mag-uuma ug trabahante sa lubi sa mga umahan kauban na ang ilang mga pamilya, pagmugna og grupo sa mga mag-uuma sa lubi ug pagpaayo niini, ug ang mga innovative research projects. (ecb/PIA7-Bohol)

Gilagdaan ni Presidente Duterte ang Republic Act 11524 o ang Coconut Farmers and Industry Trust Fund Act niadtong Pebrero 26, 2021. (PCOO)