7 ka Bol-anon namatay 

sa COVID-19 sa 1 buwan

TAGBILARAN CITY, Bohol, April 15 (PIA) -- Pito na ka Bol-anong kinabuhi ang nakalas sulod sa usa ka buwan pa lamang, kini samtang padayon pa gihapon ang ginagmay nga mga tapoktapok, bisan pa kon nagkagrabe ang pagpanakod sa coronavirus disease (COVID), sa tanang kalungsuran na sa Bohol.

Ang pagtapoktapok, nga karon dili pa unta himoon ilabi na kon dili epektibong mapatuman ang social distancing, maoy gikahadlokan nga mopa-paspas sa pagtakod sa sakit.

"Ipaagi na lang unta sa barangay, kang kinsang mga opisyal mao nay mangunay og hatud sa mga hinabang, dili kay patapokon ang mga tawo, kay kon may ipanghatag, magdasok gayud," matud pa sa obserbasyon sa usa ka opisyal sa local media, Ric Obedencio.

Kini usab samtang namatikdan nga wala nay estrikto nga pagpatuman sa mga patakaran pagpanalipod batok sa COVID, human hinuon mingdaghan ug nahimong mas kahadlokan na ang pagpanakod sa sakit.

"Labung sa una nga wala pay daghang kaso sa COVID, estrikto kaayo, karon hinuon nga daghan na ang nasakit ug nangamatay, murag wala na may naggimok," laing obserbasyon sa sakop sa media.

"Gawas pa sa pagtapok-tapok, ang nagsingabut nga buwan sa mga pista sa Bohol, lahi usab nga hagit sa pagpakunhod unta sa mga masakit," angkon usab sa usa ka medical front liner.

Segun sa mga datus nga nalakip sa taho sa Bohol Inter Agency Task Force (BIATF), ang ika pito nga namatay human sa Marso 15, us aka 63 anyos nga lalaki nga taga Tagbilaran, kinsa usab maoy ika 30 sa kinatibuk-an nakalas sa sakit.

Sa binuwan nga ihap sa mga COVID casualties, niadtong 2020 o sa milabay nga tuig, matag buwan sugod sa Marso 16, adunay halos duha ka kinabuhi (1.9) sa mga Bol-anon ang maapil sa ihap sa nangamatay.

Apan sa usa ka buwan pa lamang, o gikan sa Marso 15 nagdto sa Abril 15 niining tuiga, pito na ka kinabuhi ang nakalas.

Ang pito ka kinabuhi nga nakalas niining bag-o pa lamang, naa sa 23.33 sa kinatibuk-ang casualties diin ang nahibilin nga 23 ka mga nangamatay niadtong 2020, nagcomprise sa 76.66 porsyento nga nakakas.

Sa pito ka kinabuhi nga nakalas, kini ang gikahadlokan sa kadaghanan.

Matud pa, "kon itandi sa unang usa ka tuig nga pagpakigbugno sa Bohol sa COVID nga mitapos sa 23 ka kinabuhi human gisugdan sa Bohol ang estriktong mga pagpatuman sa mga kwarantina aron pugngan ang pagtakod sa makamatay nga sakit, sa pito, tataw nga mikalit og daghan ang namatay,"

Niadtong Marso 15, 2020, segun pa sa BIATF, sa 1070 ka mga nasakit sa COVID ug na-ulian sa ilang gibati, 23 sa mga nasakit ang namatay.

Kini may average nga katumbas sa 2.14 lamang sa matag usa ka gatus nga nasakit ang namatay.

Karon nga buwan, sa 1489 ka mga nakarecover sa sakit nga COVID, miabut na sa 30 ang Bol-anong kinabuhi ang nakalas tungod kay natakdan sa sakit

Mismo si Tagbilaran City Health Officer ang mibutyag nga sa kaso sa Tagbilaran, ang ilang mga contact tracing team mipadayag nga kasagaran nga mga bag-ong kaso sa COVID dinhi, tungod kay ilang nakuha sa patambong sa mga tapoktapok.

Ang pagpanawag sa mga tawo aron magkatapok, gihimo nga stratehiya sa mga politico kinsa nangadtoy nga makakuhag bintaha sa mga botante samtang nagsingabut ang piliay. (rahc/PIA-7/Bohol)