Pagbutang og Cooperatives Dev’t

Officer sa mga LGUs, balaod na

MANILA, April 14 (PIA)--Gilagdaan na ni Presidente Rodrigo Roa Duterte ang balaodnon nga naghatag og mandato sa pagtudlo og cooperatives development officer (CDO) sa tanang local government units (LGUs).

Ang Republic Act No. 11535 o mas gi-ila isip Cooperatives Development Officer Act, nga nag-amyenda sa Local Government Code of 1991 nga nagtugot sa pagmugna og CDO isip mandatory positions sa LGUs, gilagdaan sa Presidente niadtong Martes Abril 13, 2021.

Gilaoman nga ang mga CDOs maghatag og ‘on-the-ground’ nga suporta sa gobyerno sa mga kooperatiba.

Ubos niining balaod, ang LGUs adunay katungod kun mag-appoint og full-fledged CDO o ihiusa ang responsibilidad sa CDO sa anaa na nga posisyon, depende sa gidak-on sa sektor sa lokal nga kooperatiba, o katakus sa lokal nga kagamhanan sa paggahin sa saktong mga emolumento gikan sa budget niini.

Buwan sa Nobyembre sa niaging tuig sa dihang gi-aprobahan sa Senado sa ikatulo ug katapusang pagbasa ang balaodnon nga himuong mandatory ang pagbaton og usa ka CDO sa matag munisipalidad, syudad ug probinsya sa nasod.

Ubos sa Senate Bill 1855, tuyong amyendahan ang Local Government Code of 1991, aron mamugna ang maong posisyon alang sa tanang mga lokal nga kagamhanan sa tibuok nasod.

Ang CDO maoy responsable sa pagtumbok ug pag-asister sa mga grupo ug sektor sa pagmugna sa ilang mga kooperatiba. Kini aron masiguro nga ang pagamugnaong kooperatiba makatabang nga makuhaan ang kakabos, makamugna og mga trabaho, ug mapalambo ang mga komunidad sa nagkadaiyang mga lokalidad.

Motabang usab ang maong opisyal aron mapakonekta ang mga kooperatiba sa Cooperative Development Authority (CDA) ug uban pang ahensya sa gobyerno, ug mahatagan sila og mga tukmang training, edukasyon ug uban pang matang sa tabang.

Ubos niining balaodnon, ang ibutang nga CDO angay nga residente sa lokal nga kagamhanan diin siya madestino, usa ka college degree holder, ug first grade civil service eligible o kapareho niini. (ecb/PIA7-Bohol)

Ang Republic Act No. 11535 o mas gi-ila isip Cooperatives Development Officer Act, nga nag-amyenda sa Local Government Code of 1991 nga nagtugot sa pagmugna og CDO isip mandatory positions sa LGUs, gilagdaan ni Presidente Duterte niadtong Martes Abril 13, 2021. (PCOO)