DAR Sec mangunay’g tunol sa mga 

titulo sa mga mag-uuma sa Trinidad

TAGBILARAN CITY, Bohol, April 14 (PIA) -- Pangunayan sa pagtunol ni Department of Agrarian Reform Secretary John Castricciones ngadto sa 66 ka mga mag-uuma nga benepisaryo sa Comprehensive Agrarian Reform Program (CARP) gikan sa gibiyaan nga yuta sa Bohol Cattle Corporation ang mga titulo sa yuta nga dugay ra nilang gihandum.

Atul sa pag-subay sa kalihim dinhi sa Bohol, iya mismo nga itunol ngadto sa mga mag-uuma ug sa ilang mga banay ang ilang tagsa-tagsa ka kaugalingong mga titulo sa kinatibuk-an nga 11.8483 ektaryas, sahi sa gihatag nga mga communal titles kaniadto, sa mga mag-uuma didto sa San Vicente Trinidad Bohol karong Sabado, Abril 17.

Gipaabut usab nga duyogan si Sec Castricciones sa iyang mga deputies sama nila ni Undersecretary Emily Padilla sa Support Services Office ug Usec Virginia Orogo sa Policy, Planning and Research Office.

Ang pagtanda sa kalihim sa San Vicente, Trinidad nga maoy sentro sa mga mag-uuma nga una nga nahugpong ubos sa Talibon-Trinidad Integrated farmers Association (TTIFA) maghatag nag katumanan sa 30 kapin ka tuig nga pagpaabut sa mga mag-uuma ug ilang mga kaliwatan sa saad sa CARP.

Buot lamang ni Castricciones ug sa DAR nga maseguro nga adto gayud matunol ang mga titulo sa mismo nga benepisaryo aron ilang mabati ang pag-unong sa goberno kanila ilabi na sa pagpamatuod sa ilang mga pangandoy sa kinabuhi.

Gawas sa pagtunol sa 86 ka mga Certificates of Land Ownership Awards (CLOA) isip kamatuoran sa ila na nga pagpanag-iya sa yuta nga gihatag sa kagamhanan, itugyan usab sa DAR ang usa ka dumptruck nga nagkantidad og P3.59 milyones ug usa ka tractor nga P4.15 milyones and kantidad.

Ang mga kahimanan sa panguma, nasukip sa programa sa DAR nga Climate-Resilient Farm Productivity Support Project.

Sa milabay nga mga katuigan, subsob nga gipangunayan sa DAR ang pagpang-apod-apod sa mga titulo ngadto sa mga kwalipekado nga mga mag-uuma subay usab sa mandu ni President Rodrigo Roa Duterte nga ipadali ang pagtibawas sa pagpanghatag sa mga titulo ngadto sa mga benepisaryo sa CARP sa dili pa motapos ang termino sa presidente sa sunod tuig.

Gawas sa paghatag sa mga titulo sa mga mag-uuma sa San Vicente Trinidad, ihatud usab sa DAR pinaagi sa ilang DAR to Door program ang mga titulo sa upat ka mag-uuma nga benepisaryo sa lungsod sa Catigbian, karong Biyernes.

Subayon usab sa mga tinugyanan sa DAR ang usa ka malampuson nga Mantacida United Famers Multi-Purpose Cooperative (MUFAMPUCO), usa sa labing malampuson nga Agrarian Reform Beneficiary Organizations (ARBOs) sa Bohol. (rahc/PIA-7/Bohol/Ma. Lydia Bantugan)

SA MANDU SA PRESIDENTE. Gipas-an sa Department of Agrarian Reform ang hagit ni Presidente Rodrigo Duterte nga humanon na ang pagpanghatag sa yuta sa mga mag-uuma sa dili pa niya taposon ang iyang termino sa sunod tuig, mao nga aron kini mahapsay, gipahiluna na usab kini karon sa DAR PO Bohol. (PIA Bohol/DAR Bohol)