71 positibong kaso sa COVID-19

sa usa ka adlaw, natala sa Bohol

TAGBILARAN CITY, April 22 (PIA)--Nakatala og setenta’y uno (71) ka positibong kaso sa coronavirus disease (COVID-19) ang lalawigan sa Bohol niadtong Miyerkoles, Abril 21, 2021.

Kini base sa resulta nga nigawas sa molecular laboratory sa Gov. Celestino Gallares Memorial Hospital (GCGMH) sa syudad sa Tagbilaran niadtong adlawa.

Gikumpirmar usab kini ni GCGMH medical center chief, Dr. Mutya Kismet Macuno Huwebes sa buntag, Abril 22, 2021.

Matud pa ni Macuno nga dili moubos sa 600 ka samples ang gi-test ug kadaghanan sa positibong kaso naggikan sa syudad sa Tagbilaran.

Kining kinatibuk-ang gidaghanon sa nag-positibong kaso nga natala sa GCGMH, ang main testing center ug COVID-19 referral facility sa lalawigan, maoy pinakataas sa usa ka adlaw nga natala sukad ang lalawigan nagsugod sa pagpahigayon og test niadtong tungatunga sa 2020.

Huwebes sa buntag, Abril 22, 2021, ang lalawigan adunay kinatibuk-ang 2,107 ka kaso sa COVID-19 diin 474 niini ang aktibong kaso, 1,633 ang nangaayo ug 36 na ang nangamatay.

Samtang saysenta’y kwatro (64) ang bag-ong kaso ug 409 ang local transmission diin pinakadanghang natala sa syudad sa Tagbilaran nga nikabat sa 201.

Kalabot niini, gipahibalo sa tigpamaba sa Bohol Inter Agency Task Force (BIATF) nga si Dr. Tomas Cesar Lopez nga ang Provincial Treasurer’s Office (PTO) gi-lockdown human usa ka empleyado sa maong buhatan ang nag-positibo sa COVID-19.

Niadtong Miyerkoles, gipahibalo usab ni Provincial General Services (PGSO) chief Glenn Doloritos nga gisarado ang ilang buhatan human usa sa ilang kawani ang nag-positibo usab sa COVID-19. (ecb/PIA7-Bohol)

Base sa resulta nga nigawas sa molecular laboratory sa Gov. Celestino Gallares Memorial Hospital sa syudad sa Tagbilaran, 71 ka positibong kaso sa COVID-19 ang natala sa Bohol niadtong Abril 21, 2021, pinakataas sa usa ka adlaw nga natala sukad ang lalawigan nagsugod sa pagpahigayon og test niadtong tungatunga sa 2020. (ecb/PIA7-Bohol)