800T na ka Pinoy ang 

nabakunahan sa 1 dose

TAGBILARAN CITY, Bohol, April 13 (PIA) -- Mikabat na sa 826,607 ka Pilipino ang natupokan sa una nga dosage sa bakuna batok sa coronavirus disease (COVID), kining tanan diha sa nagkadaiyang 2,670 ka mga vaccination sites sa nasud.

Sa kinatibuk-an nga kadaghanon, 339,297 ka mga indibidwal ang gitupokan sa Sinovac vaccine samtang ang 487,310 ka indibidwal, midawat sa AstraZeneca vaccine.

Kahinumduman nga may natumbok nga 783,085 ka frontline healthcare workers sa Pilipinas, kapin sa katunga o 54.6% sa 1,434,056 nga nasulod sa masterlist sa mga pwede bakunahan nga anaa sa Priority Group A1 population, nga nakadawat sa bakuna hangtud niadtong Abril 5, 2021.

Niini usab nga kadaghanon, 314,941 nabakunahan sa Sinovac samtang 468,144 ang natupokan sa AstraZeneca vaccine.

Gani, segun sa taho sa Department of Health, miabut na sa 28,850 ka health care workers (HCWs) dinhi sa nasud ang nakakompleto na sa ilang ika duha nga dose sa Sinovac vaccine.

Dugang pa sa DOH, daghan na nga mga rehiyon ang nagsugod na og pagpangbakuna sa unang dose sa COVID-19 ngadto sa 19,049 ka mga seniors citizens na nalakip sa Priority Group A2, samtang ubos sa Priority Group A3, nga may malista nga 24,473 ka mga indibidwal nga may mga gipangbati nga lain pang sakit (with comorbidity), 24,356 na niini ang nabakunahan hangtud sa nahisgutang adlaw.

Dinhi sa Central Visayas, sa 128, 808 ka mga nahasulod sa unang master list, 39,203 na ang nabakunahan o 30.40% sa Sinovac, ug lain nga 28,975 o 22.5 % ang nahatagan sa Astrazeneca.

Hangtud gihapon sa Abril 05, 2021, 13,196 na ka healthcare workers ilawom sa Priority Group A1 ang nabakunahan.

Dugang pa, sulod sa unang buwan sa kampanya sa pagpangbakuna, sa ika kawhaan pa ug tulo ka adlaw nakuha sa nasud ang labing daghang nabakunahan dihang miabut sa 93,849 ka indibidwal ang nabakunahan.

Sa susamang adlaw gihapon, miabut sa 19,049 ka senior citizens nga naa sa Group A2 ang nabakunahan sa Astrazeneca sa NCR, Regions 4A, 1 ug Mimaropa.

Sa laing bahin, 24,473 ka indibidwal ubos sa Group A3 (kadtong may daan na nga sakit) ang nabakunahan sa unang dose batok sa COVID diin 24,356 ang nabakunahan sa Sinovac ug 117 ka indibidwal ang natupokan sa AstraZeneca. (rahc/PIA-7/Bohol)

SILANG MGA NASAYUD. Naneguro ang mga healthcare workers nga nagatrabaho sa fronline services nga makakuha ug dili malabyan sa bakuna nga magluwas kanila sa kamatayon, lahi sa mga sulti sa uban nga wala masayud kinsa nagdumili sa pagpatupok kay lagi kuno, kini makamatay. (PIA7)